Иң ауыр һынауҙар кемдәр өлөшөнә төшә?

ИҪКӘ ТӨШӨРӨҮ

Бер ваҡыт Аллаһ рәсүленән صلى الله عليه وسلم: «Иң ауыр һынауҙар ниндәй кешеләргә төшә?», – тип һорағандар. Ул صلى الله عليه وسلم былай тип яуап биргән: «Пәйғәмбәрҙәргә, шунан һуң – кешеләрҙең иң яҡшыларына. Кеше үҙ иманына ярашлы һынала. Әгәр ҙә иманы көслө булһа, уға һынауҙар өҫтәлә, ә инде көсһөҙ булһа, һынауҙары уның иманына ярашлы буласаҡ. Аллаһ ҡолона һынауҙар, ул ер өҫтөндә бер гонаһһыҙ йөрөй башлағанға тиклем, төшөүҙән туҡтамаҫ» (Тирмиҙи, Ибн Мәджәһ, Ибн Хиббән йыйынтыҡтарынан, сахих хәҙис).

Шулай уҡ Пәйғәмбәребеҙ صلى الله عليه وسلم: «Әгәр Аллаһ ниндәйҙер кешеләрҙе яратһа, Ул уларҙы һынауҙарға дусар итә. Кем һынауҙарға ризалығын күрһәтә, шул Аллаһ ризалығына өлгәшер. Ә кем асыулана, шул Уның асыуын алыр»🌹, – тигән (Тирмиҙи, Ибн Мәджәһ йыйынтыҡтарынан, сахих хәҙис).

Шулай уҡ Аллаһ рәсүле صلى الله عليه وسلم түбәндәге һүҙҙәрҙе әйткән: 🌹«Әгәр ҙә бөтә кешеләр һиңә берәй файҙа килтерер өсөн бергә йыйылһа, улар һиңә Аллаһ тәҡдиреңә яҙған ҡәҙәр генә файҙа килтерә алыр. Ә инде һиңә зыян килтерер өсөн бергә йыйылһалар, улар һиңә Аллаһ тәҡдиреңә яҙған ҡәҙәр генә зыян килтерә алыр. Сөнки ҡаурыйҙар күтәрелгән, ә биттәр – кипкән»🌹 (Тирмиҙи йыйынтығынан, хәсән хәҙис).