Өфөнөң Мәрйәм Солтанова мәҙрәсәһе институт дәрәжәһе алды

Өфө колледжы  институт кимәленә яраҡлаштырылған  Рәсәйҙә берҙән-бер мәҙрәсә. Был турала Башҡортостан мосолмандары диниә назаратының сайтында әйтелә.

• Был беҙҙең өсөн ҙур яуаплылыҡ. Хәҙер алдынғы шәкерттәребеҙ  Әл-Әзһәр институты дипломын алыу өсөн  Ҡаһирәгә  барып, өс йыл ғүмерен сарыф итмәйәсәк. Улар туранан-тура донъя ислам юғары уҡыу йортоноң бакалавриатында белем ала аласаҡ, – тине Башҡортостан мөфтөйө Айнур хәҙрәт Бирғәлин.

Колледжда әлегә тиклем дә   ғәрәп теле белгестәре, Әл-әзһәр институты уҡытыусылары белем биргән.  Килешеүгә ярашлы Өфө мәҙрәсәһе Ҡаһирә университетының әҙерлек курсына әйләнде. Шуны билдәләргә кәрәк, Әл-әзһәр университеты мосолмандар өсөн абруйлы юғары уҡыу йорттарының  береһе  булып һанала. Унда исламдың бөтөн йүнәлештәре һәм ағымдары хаҡында ентекле белем бирелә, ти белгестәр.