– Үҙегеҙ хаҡында һүҙегеҙ?
– Әбйәлил районының Буранғол ауылында тыуғанмын. Ябай башҡорт ауыл малайымын. Ғаиләбеҙҙә 5-се бала булып донъяға килгәнмен. Иң бәләкәсе булғанғамы бутҡа һәм тормошто яратам.
– Шәһит ағай, беренсе тапҡыр сәхнәгә сыҡҡанығыҙҙы хәтерләйһегеҙме?
– Беренсе тапҡыр 4-5 йәштәр тирәһендә һабантуйҙа, байрамында, сәхнәгә сығып, ҡысҡырып, “Бибинур” йырын йырланым.
– Мәктәптә нисек уҡынығыҙ?
– Мәктәптә бик “яҡшы” уҡыным (көлә). Ныҡ шаян булдым, гел иң артҡы партала ултырҙым. Хамматов фамилияһынан да ныҡ уңдым, сөнки журналдағы список буйынса миңә килеп еткәнсе, тәнәфес етә лә ҡуя торғайны.
– Бала саҡҡа ҡайтыр инегеҙме? Әгәр ҡайтһағыҙ, нимәне үҙгәртер инегеҙ?
– Бала сағыма ҡайта алһам әгәр, атайым менән һөйләшер инем.
– Яратмаған дәрестәрегеҙ булдымы?
– Иң яратҡан дәрестәрем башҡорт теле менән физкультура булһа, иң яратмаған дәрестәремдең береһе геометрия ине.
– Һеҙгә ҡайҙа белем алырға тура килде?
– 1-се синыфты ғына ауылда уҡыным, 2-се синыфтан Өфөләге музыка мәктәбендә белем алдым. 1996 йылдан баян һәм пианино бүлегендә уҡыным. Һуңынан сәнғәт училищеһына “Тынлы, Флорнет, дирижер” бүлегенә уҡырға индем. Артабан актер бүлегендә уҡыным
– Шәһит ағай, ә һеҙ бәләкәй сағығыҙҙа “Аманат” журналын уҡый торғайнығыҙмы?
– Әлбиттә, уҡый торғайным. Миңә унда бигерәк тә “Мәңгелек сер”, “Хат алышайыҡ”, “Аманат” йондоҙлоғо рубрикалары оҡшай ине.
– Ә нисә йәштә тәүге тапҡыр ғашиҡ булдығыҙ?
– Беренсе тапҡыр 7-се синыфта уҡығанда ғашиҡ булдым. Ул ҡыҙ өсөн илағаным һаманда хәтерҙә. Иланым, сөнки ул мине яратмай ине.
– Бөгөн ниҙәр менән мәшғүлһегеҙ?
– Әлеге ваҡытта Милли йәштәр театрында эшләйем. Актермын. Бынан тыш төрлө юбилейҙар, туйҙар, төрлө мәҙәни сараларҙа алып барыусы булараҡ сығыш яһайым.
– Хоттабыч ҡарт нисек барлыҡҡа килде?
– Фамилиям “Хамматов” булғас, шуға оҡшаш булһын тип, бер ваҡыт “Хоттабыч” булып кейенеп матчҡа барҙым. Мин барып кереү менән “Гол” индерҙеләр. Шулай итеп, мин “Хоттабыч” булып барһам еңәбеҙ, бармаһам – еңеләләр. Шулай итеп мине хатта Ҡаҙан, Питер, Омскиға саҡыралар.
– Ниндәй фильмдар, йәнһүрәттәр ҡарайһығыҙ?
– Беҙ, ғөмүмән, телевизор ҡарарға яратмайбыҙ, күберәк өй эштәре менән булышабыҙ, баянда уйнайбыҙ. Ә Фильмдарға килгәндә, иһә – “Властелин колец”, йәнһүрәттәргә килгәндә, “Тамыр” телеканалын ҡарайбыҙ.
–Ғаиләгеҙ тураһында ла бер-ике һүҙ әйтеп китегеҙ әле?
– Иптәшем Айһылыу менән Ҡәҙриә исемле ҡыҙыбыҙҙы үҫтерәбеҙ.
– Артис һөнәренең “плюс” һәм”минус“тары?
– Плюстарына килгәндә минең өсөн ул – бер “ваҡыт машинаһы”. Төрлө заманға эләгеп, төрлө геройҙарҙы, кеше яҙмыштарын уйнау, ә минустары иһә – ғаиләгә ваҡыт аҙ ҡалыуҙа.
– Сәнғәт менән киләсәген бәйләргә теләүселәргә кәңәштәрегеҙ?
– Ҡыйыуыраҡ, асыҡ йөҙлө булһындар, аптырамаһындар, ҡайғырмаһындар, мыжымаһындар. “Хәрәкәттә – бәрәкәт” тигән мәҡәлде онотмаһындар. Телефондан айырылып, күберәк тышта йөрөһөндәр, “Аманат”ты уҡыһындар.
Сәлимә Ҡаранаева әңгәмәләште.