Рената Ибәтуллина - Йыл һылыуы

“Ай, һылыу!” конкурсы 2025 йылда ла дауам итә. Уның шарттары буйынса, конкурсанттар араһынан ай һайын бер Ай һылыуы беҙҙең төркөмдә тауыш биреү юлы менән билдәләнеп, фотоһы журналда баҫылып барасаҡ. Ә йыл һуңында 12 ай һылыуы араһынан һайлап алынған Йыл һылыуының фотоһы журнал тышында сығасаҡ.Һеҙҙән үҙегеҙ, туғандарығыҙ йәки әхирәттәрегеҙ хаҡында йөкмәткеле хаттар һәм сифатлы фотолар көтәбеҙ.Ай һылыуҙарын һайлаған саҡта фотоларҙың сифаты ла, хаттарҙың йөкмәткеһе лә, ҡыҙҙарҙың тормошта ла, уҡыуҙа ла әүҙем булыуҙары ла иҫәпкә алынасаҡ.

Байтаҡ йылдар дауамында журналыбыҙҙа йыл һайын үткәрелә килгән сираттағы “Ай, һылыу!” кғонкурсына йомғаҡ яһарға ваҡыт етте. 12 ҡыҙ – ай һылыуҙары араһында еңеүгә өлгәшеп, быйыл Йыл һылыуы исемен Ауырғазы районының Талбазы ауылы ҡыҙы Рената Ибәтуллина яуланы.
– Рената һылыу, тиҫтерҙәреңде иң беренсе үҙең менән таныштырайыҡ: ҡайҙа йәшәйһең, ҡайҙа уҡыйһың?
– Мин республикабыҙҙың иң матур райондарының береһе булған Ауырғазы районының Талбазы ауылында йәшәйем. Рәшит Назаров исемен йөрөткән Башҡорт гимназияның 2-се синыфында белем алам.
– Ғаиләгеҙҙә нисә кешеһегеҙ?
– Беҙҙең ғаилә ҙур, татыу. Атайым Фидәил — “Урожай”ҙа водитель, әсәйем Әлиә Талбазы лицейында уҡытыусы булып эшләй, ағайым Радим — Шайморатовсылар синыфында, апайым Ралина — 6-сы синыфта белем ала, ә һеңлем Йәсминә балалар баҡсаһына йөрөй.
Беҙ барыбыҙ ҙа гимназияла уҡыйбыҙ. Ағайым һәм апайым менән бергә гимназияла уҡыу бик күңелле.
– Киләсәктә кем булғың килә?
– Киләсәктә мин, табип һөнәрен һайлап, кешеләргә ярҙам итергә теләйем.
– Рената, матурлыҡтың, һылыулыҡтың сере нимәлә?
– Матур уйҙар, эске рухи байлыҡ һәм үҙ-үҙеңде яратыуҙа тип уйлайым.
– Һин ниндәй кеше? Ҡыйыумы, әллә баҫалҡымы?
– Мин бик баҫалҡы, оялсанмын. Ошо сифаттарым ҡайһы саҡта ҡамасаулай ҙа әле.
– Журнал уҡыусыларына теләктәрең бармы?
– Тырышып уҡыһындар, ата-әсәйҙәрен тыңлаһындар, “Аманат” журналын алдырһындар тип теләйем.
– Тағы бер тапҡыр еңеүең менән ҡотлайбыҙ! Һиңә гел уңыш йылмайып торһон!
– Теләктәрегеҙ өсөн ҙур рәхмәт!