Үҙе матур, үҙе ҡыйыу!..

— Азалина, һинең шөғөлдәрең бик күп. Уҡыу­ҙан тыш нисек барыһына ла өлгөрәһең?
— Миңә атайым, әсәйем, ҡартайым һәм өләсәйемдәр ярҙам итә. Ғәҙәттә, мине ҡартатайым һәм өләсәйем­дәр түңәрәктәргә йөрөтә. Ва­ҡыттары булғас, күбеһенсә ҡартатайым мине мәктәптән барып ала, өләсәйем түңәрәктәргә лә алып йөрөй.
— Һин Бөтөн Рәсәй гүзәллек бәйгеһенең Гран-приһын яулағанһың. Унда "Милли суперйондоҙ" номинацияһында ла еңгәнһең. Һиңә ошо бәйгеләрҙең нимәһе нығыраҡ оҡшай?
— Иң беренсе, миңә был бәйгеләрҙә икенсе ҡалаларға барып ҡайтыу һәм тиҫтерҙәрем менән танышып, дуҫлашыу оҡшай. Матур күлдәктәр кейеү һәм матур уйынсыҡтар алыу — үҙе бер бәхет.
— Ҡайһы бер саҡта еңмәгән мәлдәрең дә булғандыр. Был осраҡта һин үҙеңде нисек тотаһың? Илайһыңмы?
— Юҡ. Мин ундай осраҡтарҙа тик сәмләнәм генә һәм икенсе тапҡыр нығыраҡ тырышам.
— Азалина, һин "Ҙур проект" киностудияһының ҡыҫҡа метражлы фильмдарында ла төшөп өлгөргәнһең, был хаҡта һөйләп ебәр әле?
— Киноға төшөргә мин күптән хыялланған инем. Беренсе тапҡыр кинопроект мин ҡатнашҡан "Ҡарһылыуҡай" конкурсы эсендә ойошторолдо. Оҡшаны, съемкалар бик күңелле утте. Аҙаҡтан үҙемде ҙур экранда күреү бик ҡыҙыҡ тойолдо. Әлбиттә, шатландым.
— Башҡорт һәм татар эстрада йондоҙҙарының бер клибында һине күреп ҡалдым. Был өлкә лә һиңә ҡыҙыҡмы?
— Тап шулай. Хатта киләсәктә, берәй матур йырымды яҙҙырып, уға клип төшөрөргә ине тигән хыялым да бар.
— Азалина, һинең һөнәр­ҙәреңде белгән һайын һоҡланам ғына. Бына әле һинең дизайның буйынса әҙерләнгән күлдәк коллекцияһын ҡарап ултырам. Һин дизайнер булырға ла өлгөргәнһең бит!
— Әйе, һәр матурлыҡ бәй­геһенә мин үҙемдең дизай­ным буйынса тегелгән зиннәтле күлдәктәр әҙерләнем, шуға күрә мин "йәш дизайнер" конкурсына ҡат­нашыуға саҡырҙылар, һөҙөмтәлә конкурсҡа мин Һомай образын һәм бер нисә матур кулдәк әҙерләнем һәм Гран-приға лайыҡ булдым.
— Һинең уйнарға ваҡытың ҡаламы ул?
— Ҡала, әлбиттә. Өйгә эштәремде эшләп бөткәс, бесәйем менән уйнап алам. Әхирәттәрем менән ишек алдында уйнайбыҙ. Шулай уҡ мине атайым менән әсәйем төрлө уйын майҙансыҡтарына йөрөтә.
— Ә һин ниндәй мәктәптә уҡыйһың һәм уҡыуы оҡшаймы?
— Мин Өфө ҡалаһының Фатима Мостафина исемендәге данлыҡлы 20-се Башҡорт гимназияһында белем алам. Яҡшы уҡырға тырышам. Өҫтәүенә инглиз телен өйрәнеү, робототехника түңәрәктәренә лә йөрөйөм.
— Азалина — һин шәп ҡыҙ! Беҙ һиңә алдағы тормошоңда тағы күп еңеүҙәр теләп ҡалабыҙ. Башҡорт халҡының билдәле шәхесе бул!