Иҫке Күл мәктәбе - аң-белем үҙәге

Ләйсән бик даланлы ҡыҙ бу­лып сыҡты: 2019 йылдың 2-се яр­тыһына яҙылыусылар араһында тағы еңеүсе булып, “Аманат”тың фирма сәғәтен отто. Был юлы беҙҙең бүләкте уға мәктәп ди­ректоры Гөлфиә Ғәбделәхәт ҡыҙы Сакаева тапшырҙы.

Мәктәптең тыуған яҡты өй­рәнеү музейын башҡорт халҡының тарихын сағылдыр­ған бик күп экспонаттар туплау­ға өлгәшкән Нәфисә Ғәйетҡол ҡыҙы Бәҙертдинова етәкләй. Ғүмер буйына башланғыс синыфтарҙы уҡытып, хаҡлы ялға сыҡһа ла, мәктәбенә әле лә тоғро ветеран-уҡытыусы. Башҡортостаныбыҙҙа милли биҙәктәргә өҫтөнлөк артыуын күҙ уңында тотоп, Нәфисә Ғәйетҡол ҡыҙы “Милли биҙәктәр” түңәрәге лә асып ебәрә. Уҡыусы ҡыҙҙар бында һаҡал, түшелдерек һәм башҡа биҙәүестәр эшләргә өй­рәнә. Береһенән-береһе матур эштәрҙе күреп, ҡыҙҙарҙың тил­берлегенә, оҫталығына һоҡлан­дыҡ.

- Беҙҙең мәктәпкә Исай, Иш­морат ауылдарынан да килеп уҡый балалар. Уҡыу һәм төрлө конкурстар буйынса ғына түгел, спортта ла алдынғылар рәтендә уҡыусыларыбыҙ. Район кимәлен­дәге саралар ҙа беҙҙә йыш ойошторола,- ти директор Гөл­фиә Ғәбделәхәт ҡыҙы Сакаева.

Мәктәптә оҙаҡ йыл­дар “Сулпылар” бейеү түңәрәге лә эшләп килә. Ике төркөмдә 30-лап ҡыҙ шөғөл­ләнә. Бейеү серҙәренә уларҙы Айгөл Марс ҡыҙы Фәтҡуллина төшөндөрә. Репертуарҙарында “Бөрйән ҡыҙҙары, “Батмус”, “Бал ҡорттары” кеүек бейеүҙәр урын алған. Әйткәндәй, етәкселәре Айгөл Марс ҡыҙы үҙе лә респуб­лика кимәлендә үткән конкурста “Заһиҙә” бейеүен башҡарып, өсөнсө дәрәжә дипломға лайыҡ булған.

Бала күңелендә башҡорт теленә, әҙәбиәтенә һәм мәҙәниәтенә һөйөү тәрбиәләү - уҡытыусыларҙың оло хеҙмәт емеше. Етенсе синыф уҡыу­сыһы Нияз Сәйфуллин менән унынсынан Венер Мырҙағоловҡа һөйләү оҫталығы буйынса берәү ҙә тиңләшә алмай. Район кимәлендә үткән З. Насибуллин исемендәге шиғыр һөйләүселәр конкурсында Нияз - икенсе урын, ә Венер гран-при яулаған!

- Бөтөн фәндәрҙән дә тик яҡшы билдәләргә өлгәшәм. Шиғыр уҡырға ла, ятларға ла бик яратам. Һөйләү оҫталығына уҡытыусым Әминә Наил ҡыҙы Борханова өйрәтә, - тине Венер.

Уҡытыусылар менән уҡыу­сылар араһындағы йылы, ихлас мөнәсәбәттәрҙе күреп, ифрат һөйөндөк. Гаджеттар, виртуаль донъяның көндән-көн бала күңелен яулауы тураһын­да саң ҡағылғанда был - ыңғай күренеш. Тимәк, Иҫке Күлдә ба­лаларға белем биреү менән бер рәттән рухи яҡтан үҫеүҙәре өсөн дә күп эшләйҙәр, ваҡыттарын ҡыҙғанмайҙай.

Нурия Әхтәмова.