Тәмле кәнфитте үҙебеҙ эшләйек!

Тәмле кәнфитте үҙебеҙ эшләйбеҙ!

Йыуып әҙерләгәнгән, ҡоро, кипкән сәтләүектәрҙе, емештәрҙе, һәр береһен айырым ит турағыс аша үткәрәбеҙ.

Ярты кило (ҡатнашмаһын, ауырлығын үҙегеҙсә самалағыҙ) кипкән емеш, сәтләүек үткәрмәһен бергә ҡушып, яҡшылап болғатабыҙ. Бер әфлисунды ит турағыс аша үткәреп, ҡушып ебәрергә лә була. Ошо ҡатнашмаға 4-5 ҡалаҡ бал (ҡуйы булһа, утта йылытып алабыҙ) өҫтәйбеҙ (үҙегеҙгә нисек оҡшай). Тәменсә семетем генә корица, кардамон, ике ҡалаҡтай лимон һуты өҫтәргә була. Был массанан уртаса ҙурлыҡта йоморҡастар әүәләйбеҙ. Шарҙарҙы кокос онтағында, мәк орлоҡтарында әүәләп алырға ла, матурлыҡ өсөн өҫтөнә аҡ йәки ҡара кунжут һибеп сығабыҙ. Иң мөһиме тәмле булһын, ә биҙәлешен үҙегеҙҙең фантазияға ҡарап эшләгеҙ. Бүләккә тигән кәнфиттәрҙе матур ҡумтаға, йәки ыҡсым кәрзингә теҙеп һалып, сағыу таҫма менән биҙәп ҡуйырға була.

БЕЛЕШМӘ:

Кипкән емештәрҙә витаминдар күп тупланған. Шуға ла улар иммунитетты күтәреүе, йөрәк-ҡан тамырҙары системаһын нығытыуы, эсәктәргә ыңғай тәьҫире менән файҙалы икән. Был кипкән емештәрҙә тупланған фруктоза, глюкоза углеводтарын, минераль матдәләрҙе беҙгә йомарт тәбиғәт үҙе бүләк итә.

Күрәгә йөрәк ауырыуҙары, матдәләр алмашыныуына, ашҡаҙан-эсәк, аҙ ҡанлылыҡ, күреү һәләте кәмегәндә, ҡан әйләнешенә ярҙам итә. Сәстәрҙе матурлай, тирене йәшәртә.

Ҡара емеште (йөҙөм) борондан дауалау өсөн ҡулланғандар. Ҡан баҫымы юғарылығында, атеросклероздан дауалай, ашҡаҙан-эсәк юлдарын, бөйөр эшмәкәрлеген яҡшырта, токсиндарҙы сығара. Йөҙөм ҡанды таҙарта, гемоглобинды күтәрә, стресс, депрессияларҙан һаҡлай. Йөҙөмдө гел генә ашап торғандарҙың йөрәге сәғәт кеүек эшләй, мейе эшмәкәрлеген яҡшыра. Үҫмер саҡта тән үҫешенә ыңғай йоғонто яһаусы бөтөн булған туҡлыҡлы матдәләргә лә бай был емеш.

Инжир – тын юлдары, аҙ ҡанлылыҡ, шәкәр диабеты, яман шеш, юғары ҡан баҫымын дауалауҙа өҫтәмә сара булып тора. Һөйәк системаһын да нығыта.

Финик хроник арыуҙы, юғары ҡан баҫымын, йоҡоһоҙлоҡто, депрессияны дауалай.

Аллергия, тын ҡыҫылыуы (астма), бөйөрҙә таш булғандарға, ашҡаҙан-эсәк юлдары менән яфаланыусыларға был кипкән емештәрҙән ауыҙ итеүҙән тыйылып торорға кәңәш итә табиптар.

Организмға файҙаһы күберәк булһын өсөн һатып алғанда емештәрҙе дөрөҫ һайлай белергә лә кәрәк.

Мәҫәлән, күрәгә, бер ниндәй тапһыҙ, көрән, йәки ҡыҙғылт һары төҫтә, ә ҡара емеш классик ҡара, ҡатыраҡ, шыма ғына, эсе тығыҙ булырға тейеш. Йөҙөмдө һатып алғанда “ялтыр” булыуына, “матур”лығына ҡыҙмағыҙ, киреһенсә, төҫһөҙөрәге, емештең һабағы булғаны файҙалы. Инжирҙы бик ҡоро, ҡаты булмағанын һайлайбыҙ. Аҡһыл көрән, ялтырауыҡһыҙ, бер ниндәй тапһыҙ ҡабыҡлыһы тәбиғи булыр. Ҡытыршы тышлыһы глюкоза, йәки ныҡ татлы икәнлеген күрһәтә. Финиктарҙың ҡарараҡ төҫөн, мотлаҡ һөйәге булғанын, бер аҙ шырышҡанын, йомшағын, бөтөнөн, тиреһе ярылмағанын һайлайбыҙ. Финик менән инжиҙы сифатлы картон ҡаптарҙа һатып алыу уңайлы. Кипкән емеште ҡулланыр алдынан ҡайнар һыу менән бешекләп алырға кәрәк. Буяуы һәм химия ҡатнашмаһын сығарыр өсөн 15-20 минутҡа эҫе (ҡайнар түгел) һыуҙа ебетергә һалабыҙ. Грек сәтләүеген, миндаль, арахис, фундукты йыуып, икмәк мейесендә 150 градуста 10 минуттай талғын ғына киптереп алабыҙ.

Зөбәржәт ЯҠУПОВА әҙерләне.