Ошо программа сиктәрендә АҠШ-та өс тапҡыр булған Сашаның тәьҫораттары беҙгә бик ҡыҙыҡлы тойолдо. Уның яҙғандарын ҡыҫҡартып журнал уҡыусыларыбыҙға тәҡдим итергә булдыҡ.
– Төньяҡ Каролина штатының Нью-Берн ҡалаһына 6-10 кешенән торған команда менән килдек. Америкала беҙҙе бик ихлас көтөп алалар, сөнки ундағы дуҫтарыбыҙға беҙҙең уйындар, мастер-кластар бик оҡшай. Беҙ ҙә уларҙың көндәлек тормошо, йолалары менән ихлас ҡыҙыҡһынабыҙ, ҡайһы ваҡыт йәшәү ҡиммәттәре ҡайһылай ныҡ айырыла икән тип ғәжәпләнеп тә ҡуябыҙ.
Американ ғаиләһендә ғәҙәти иртә нисекме? Әсә кеше аш бүлмәһендә, атай ҡәһүә эсә, балалар мәктәпкә йыйына. Иртәнге аштан һуң, әсәй әҙерләп биргән ланч-бокстарҙы алғас, атайҙары уларҙы машина менән мәктәпкә илтеп ҡуя. Мәктәпкә китер алдынан балалар йәнһүрәт ҡарай. Әйткәндәй, был илдә нисә тапҡыр булһам да, бер ҡасан да яңылыҡ тыңлағандарын ишетмәнем. Американдар донъяла барған хәл-ваҡиғалар менән бөтөнләй тиерлек ҡыҙыҡһынмай, хатта күршеләге штатта ниндәй яңылыҡтар булыуын да белмәй. Барыһы ла бик мөһим мәсьәләләр менән мәшғүл: нисек тыуған көндө билдәләргә, сығарылыш кисәһенә ниндәй күлдәк кейергә, сираттағы ялды ҡайҙа үткәрергә һ.б.
Һәр иртә мәктәптә спорт залынан башлана. Баскетбол бик популяр уйын һанала. Уҡытыусылар менән уҡыусылар бер-береһенә ҡаршы уйнарға ярата. Уйында ҡатнашмағандар трибуналарҙан уйынсыларҙы күҙәтә йәки дуҫтары менән гәпләшә.
Һәр дүшәмбе һәм йома көндө иртәнге туғыҙынсы яртыла дөйөм йыйылыш үтә, унда уҙған һәм буласаҡ саралар тураһында фекер алышалар. Аҙаҡ бөтә мәктәп буйынса бер минут ғибәҙәт ҡылына һәм дәрес башлана.
Дәрестәр төрлөсә үтә. Уҡытыусылар өйгә эштәрҙе йыйып ала йәки уның бармы-юҡмы икәнен тикшерә. Физика дәресендә, мәҫәлән, төрлө проекттар эшләнә. Уҡыусылар дәрестә үткән приборҙарҙың моделдәрен һәм механизмдарын эшләп ҡарай. Башланғыс синыфтарға тәжрибәләр күрһәтәләр.
Миңә Америкала иң оҡшағаны life skills тигән дәрес булды. Унда йәшәү ҡиммәттәре тураһында һөйләнелә, фекер алышыу өсөн төрлө темалар бирелә. Беҙҙәге синыф сәғәтенә оҡшаған.
Мәктәптәрҙең бер ҡатлы булыуы бик уңайлы. Һәр синыф бүлмәһенән коридорға һәм урамға сығыу өсөн ике юл бар. Алмаш аяҡ кейемендә йөрөмәйҙәр. Бында бер кем дә аяҡ кейемен сисмәй, хатта өйҙәрендә лә шул килеш йөрөйҙәр. Ни өсөн тигәндә, урамдарында иҫ китес таҙа.
Уҡытыусылар менән уҡыусыларҙың үҙ-ара мөнәсәбәте лә бик йылы тойолдо миңә. Педагогтар һине үҙ тиңеләй күреп һөйләшә, уҡыусыларҙың хоҡуҡтарын ихтирам итә. Балалар дәрес ваҡытында йөрөп ала, теләһә, иҙәнгә ултырып, эште үтәй. Дәрес ваҡытында уҡытыусыны кока-кола банкаһы менән дә күрергә мөмкин.
Мәктәп ҡағиҙәләренә килгәндә, кеҫә телефоны менән ҡулланыу тыйыла. Һәр синыфта стационар телефон бар һәм уҡытыусылар ҙа үҙ-ара уның аша аралаша. Уҡыусылар тик планшет һәм А4 форматындағы пластик тышлы дәфтәрҙәр менән файҙалана. Әйткәндәй, wi-fi паролен улар белмәй. Әгәр кәрәк булһа, планшетҡа паролде махсус хеҙмәткәрҙәре үҙе индерә.
Аҙна һайын бер төркөм уҡыусылар ауыр тормош хәлендә тороп ҡалыусыларға ярҙам итеү үҙәгенә бара. Унда ашарға әҙерләйҙәр, ирекмәндәр килтергән кейемдәрҙе барларға ярҙам итешәләр. Бындай үҙәктәр дәүләт иҫәбенә йәшәп килә.
Уҡыусыларҙың үҙ комплект кейеме – мәктәп эмблемаһы төшөрөлгән төрлө төҫтәге бер нисә футболка, молниялы йылы кофта һәм спорт формаһы бар.
Бында көндөҙгө өскә тиклем уҡыйҙар. Балаларҙы атаһы йәки әсәһе килеп ала. Күп ғаиләләрҙә әсәйҙәр эшләмәй. Бала тәрбиәләү улар өҫтөндә. Атай кеше эштән ҡайтҡас, киске ашты бергәләп ашайҙар. Аш алдынан ғибәҙәт ҡылалар. Балалар бүлмәһендә тәртип әллә ни юҡ. Әммә әсәләре, инеп, тәртип урынлаштырып, арттарынан йыйып йөрөмәй. Ғөмүмән, американдар һәр нәмәгә юмор менән ҡарай. Көндәлек тормошта осраған ваҡ-төйәккә иҫтәре китеп бармай. Сит кешеләргә үҙ проблемаларын һөйләмәйҙәр, бары тик һөйөнөслө хәбәрҙәр менән генә бүлешеү ғәҙәткә ингән.
Бында һурпа һәм шыйыҡ ашамлыҡтар юҡ. Бутерброд, газлы һыу, чипсы һәм төрлө тәм-томдар төп ризыҡ һанала. Иртәнге аш омлет һәм әфлисун һутынан тора. Мәктәптә төшкө аш өсөн балаға бутерброд, чипсы, газлы йәки ябай һыу, алманан ланч ебәрелә. Киске ашҡа иһә ит менән спагетти, салат тәҡдим ителә.
Америкала тормош байрам кеүек. Көн һайын ниндәйҙер сараға әҙерләнәләр: йә Хеллоуин, йә тыуған көн, йә мәктәп кисәһе… Уҡыусыларҙың күбеһе таныш түгел кешеләр менән дә күңел асырға ярата. Хатта бөтөнләй белмәгән кешеләргә лә тыуған көнгә бара. Үҫмерҙәр гаджет ярата, фейсбук, снэпчат һәм инстаграмм ҡуллана.
Беҙ рәсәйлеләр американдарҙан ҡайһы яғыбыҙ менән айырылабыҙ һуң? Минеңсә, сабыр, түҙемлерәкбеҙ. Америка балалары ни тиклем арыған һайын нығыраҡ тауышлана. Мәҫәлән, Вашингтонга экскурсияға барғайныҡ. Биш сәғәтлек юлды бик ауыр кисерҙеләр. Мыжый, илай башланылар һәм ҡала буйлап йөрөгәндә ҡайһы берәүҙәре, түҙмәй, ергә ятып, йоҡлап та китте. Уларҙың кинофильмдарын ҡараһаҡ, күп осраҡта беҙ үҙ аллы, көслө ихтыярлы үҫмерҙәрҙе күрәбеҙ. Ысынында иһә улай түгел. Уларэйәртеүсе түгел, ә эйәреп йөрөүсе.Һорауҙарҙы күп бирмәйҙәр, әллә ни артыҡ уйланмайҙар һәм ҡыҫҡа мөҙҙәтле ваҡиғалар менән йәшәүҙе хуп күрәләр.
Нурия ӘХТӘМОВА әҙерләне.