Матбуғатҡа яҙылыусы көнө һөҙөмтәле үтте

Ташламалы яҙылыу Бөтә Рәсәй льготалы яҙылыу ун көнлөгө сиктәрендә барҙы.

– “Изге подписка”ла теләгән бер кеше ҡатнаша ала, – тине “Республика Башкортостан” нәшриәт йорто акционерҙар йәмғиәтенең ваҡытлы матбуғатты таратыу бүлеге начальнигы урынбаҫары Клара Әхиәрова, – бары тик МХО ғаиләләре ағзаларын, китапханаларҙы, уллыҡҡа алынған йә күп балалы ғаиләләрҙе йәки ҡыҙыҡлы, дөрөҫ, намыҫлы әҙәбиәт алырға теләгән уҡыусыларыбыҙҙы хәйриә ғәмәле сифатында теге йә был баҫмаға яҙҙырыу ғына кәрәк.

Нәшриәт йорто хеҙмәткәрҙәре бындай сараны Өфөнән ситтә лә үткәргеләй. Быға тиклем Дүртөйлө, Ғафури райондарына сыҡтылар. Баш мөхәррирҙәр ҡатнашлығында ла ижади осрашыуҙар үткәрелә.

Бөгөн “Китап” магазинына китап һөйөүселәр күпләп килде, хәйриә сараһында ҡатнашыусылар ҙа байтаҡ булды. Мәҫәлән, уларҙың береһе Зөлфиә Әхмәтйәнова Ҡыйғы районынан бер ҡыҙ балаға бүләккә “Аҡбуҙат” журналын яҙҙырҙы. Ул бала ошо журналды алдырырға бик теләгән икән.

– Хәйриә сараһы барғанын белгәс, унда барырға ҡарар иттем. Мин ҡыҙыҡайға 12 айлыҡ бәхет бүләк иттем. Ул шатланыр тип уйлайым, бер ҡыҙға изгелек эшләүем мине лә бәхетлерәк итә, – тине Зөлфиә ханым.

“Боронғо Өфө” музейы һәм ҡурсаулығы етәксеһе Илнур Лоҡманов, сарала ҡатнашып, уның урындағы баҫмаларҙы популярлаштырыуҙағы әһәмиәтен билдәләне. Ул Стәрлебаш районында йәшәгән ағаһына, МХО ҡатнашыусыһының атаһына, “Ҡызыл таң” гәзитен яҙҙырҙы.

– Мин был сарала йыл да ҡатнашам һәм туғандарым һәм республикам менән ғорурланам. Беҙ интернет дәүерендә йәшәйбеҙ,  ләкин ҡағыҙ гәзиттәрҙе уҡыуҙы дауам итәбеҙ. Йәштәр быны иҫтә тоторға тейеш, – тине Илнур Лоҡманов.

Башҡортостандың Ғәҙәттән тыш хәлдәр буйынса дәүләт комитеты рәйесе урынбаҫары Ғәзиз Манапов Матбуғатҡа яҙылыусы көнөндә тәүләп ҡатнаша. Ул сараның матур биҙәлешен, кешеләрҙең әүҙем ҡатнашыуын, үҙе өсөн дә был көндөң байрамса булыуын билдәләне. Ғәзиз Манапов махсус хәрби операция ҡатнашыусыһы ғаиләһе өсөн “Шоңҡар” журналын яҙҙырҙы.

“Изге подписка”ла БР Матбуғат һәм киң мәғлүмәт саралары буйынса агентлыҡ етәксеһе Максим Ульчев, БР Конституция суды рәйесе Хәйҙәр Вәлиев, шахматсы Айнур Шәйбәков, политолог Тимур Вәлитов ҡатнашты.

Сығанаҡ: “Молодежная газета” гәзите.