Һөнәрҙе нисек һайларға?

Ни өсөн һөнәр һайлау мөһим?
Һөнәр һайлау профессиональ юлды ғына түгел, ә шәхси үҫеште, социаль бәйләнештәрҙе һәм финанс именлекте лә билдәләй. Һөнәрҙе дөрөҫ һайлау потенциалын тормошҡа ашырырға, уңыштарға өлгәшергә һәм үҙ эшмәкәрлегенән ләззәт алырға мөмкинлек бирә.
Һөнәрҙе дөрөҫ һайлауға аҙымдар
Үҙ-үҙеңде анализлау һәм баһалау. Беренсе аҙым — үҙ мәнфәғәттәреңде, нимәгә һәләтле булыуыңды һәм ынтылыштарыңды аңларға тырыш. Бының өсөн психологик тесттар үтеү файҙалы булыр. Мәҫәлән, Голланд тесты йәки Климов тесты. Улар типик профессиональ өҫтөнлөктәрҙе билдәләргә ярҙам итә.
Үҙ-үҙеңде анализлау мәсьәләләре. Мине иң ҡыҙыҡһындырғаны нимә? Мәктәптә ниндәй предметтар еңел бирелә? Аҡсам булмаһа ла, нимә менән шөғөлләнер инем? Үҙ-үҙеңә ошондайыраҡ һорауҙар биреп ҡара.
Хеҙмәт баҙарын өйрәнеү. Иҡтисад үҫеше тенденцияларын һәм һөнәрҙәргә ихтыяжды иҫәпкә алыу мөһим. Мәҫәлән, әлеге ваҡытта IT-технологиялар, медицина, экология һәм альтернатив энергетика әүҙем үҫешә. Эксперттарҙың фараздарын өйрән. Вакансиялар йәрминкәләренә һәм карьера форумдарына бар.
Профессионалдар менән кәңәшләшеү. Ҡы­ҙыҡ­­һындырған өлкәләрҙә эшләүсе кешеләр менән аралашыу һөнәрҙең үҙенсәлектәрен, белгестәргә талаптарҙы һәм үҫеш перспективаларын яҡшыраҡ аңларға мөмкинлек бирәсәк. Стажёр, ирекмән булып, тәжрибә туплау өсөн ҡайҙалыр эшкә урынлашырға тырышығыҙ.
Белем һәм уҡыу
Һайлаған һөнәрегеҙ өсөн кәрәкле белем кимәлен билдәләгеҙ. Ҡайһы бер һөнәрҙәр юғары белем талап итә. Башҡаларына урта һөнәри белем дә етә. Үҙегеҙ йәшәгән ерҙәге юғары уҡыу йорттарында һәм колледждарында әҙерлек программалары тураһында белеш.
Йомғаҡлау
Һөнәр һайлау — ваҡыт һәм көс талап иткән даими процесс. Шуны иҫтә тот: икенсе һөнәрҙе һайлау ҡотолғоһоҙ сара түгел, сөнки эшмәкәрлек йүнәлешен үҙгәртергә мөмкин. Иң мөһиме — үҫешкә һәм үҙ-үҙеңде камиллаштырыуға ынтылырға кәрәк. Ул сағында уңыш мотлаҡ киләсәк!

Әлфиә ЯҠУПОВА,
медицина психологы.