+9 °С
Ясно
Дөйөм мәҡәләләр
21 Мая , 04:25
Беренселәр хәрәкәте
Республикабыҙҙа «Беренселәр хәрәкәте» Дөйөм Рәсәй балалар һәм йәштәр ижтимағи-дәүләт хәрәкәтенең төбәк бүлексәһе 2023 йылда булдырылды. Бөгөн төбәк бүлексәһе рәйесе Илнур Юлдыбаев етәкләгән хәрәкәт Башҡортостанда тиҙ үҫешә һәм әле илдә алдынғы төбәк бүлексәләренең береһе булып тора. Хәрәкәттә 6 йәштән 25 йәшкә тиклемге 300 меңдән ашыу бала, үҫмер һәм уларҙың остаздары берләшкән. Башҡортостандың «Беренселәр хәрәкәте» грант конкурсы һөҙөмтәләре буйынса ла дүртенсе йыл рәттән Рәсәйҙә лидерҙар иҫәбенә инә.
Беренселәр хәрәкәте
2025 йылда, мәҫәлән, төбәктә 60-тан ашыу проект тормошҡа ашырылды. Быйыл да шул уҡ проекттар әүҙем эшләп килә. Мәҫәлән, «Рәсәй мәктәп яҙы» фестиваль-проектының төбәк этабы Өфөнөң «Торатау» конгресс-холында 1500-ҙән ашыу ҡатнашыусыны йыйҙы. Иң яҡшылары быйыл 15-16 майҙа Ставрополдә республика исеменән сығыш яһаясаҡ.
Республикабыҙҙың һәр районында үткән «Зарница 2.0» Бөтә Рәсәй хәрби-патриотик уйынында 90 меңдән ашыу мәктәп уҡыусыһы һәм студент ҡатнашты. Улар үҙҙәрен командирҙар, БПЛА операторҙары, медиктар, хәрби хәбәрселәр, штурмовиктар һәм политруктар ролендә һынап ҡарай, заманса технологияларҙы үҙләштерә һәм тарихты өйрәнә.
Тағы ла бер мөһим йүнәлеш – медиасфера. 20 майҙа тамамланасаҡ «МедиаЫнтылыш» проектының яңы миҙгелендә «Беренсе студенттар» республика слеты һәм «Беренселәр хәрәкәте»нең райондарҙағы бүлексәләре рәйестәре һәм активистарының республика слеты проекты үткәреләсәк.
Шулай итеп, системалы эш, республика етәкселегенең ярҙамы, балаларҙың энергияһы менән Башҡортостанда «Беренселәр хәрәкәте» эшмәкәрлеге уңышлы бара. Беренселәребеҙгә киләсәктә лә һәр саҡ беренсе, алдынғы булып ҡалыуын теләйбеҙ.
Зилә ҒӘЛЛӘМОВА.
