Мәләүез кадет корпусы

- Корпус асылғандан алып меңдән ашыу егет һәм ҡыҙ хәрби белем алды, шуларҙың дүрт йөҙҙән ашыуы тормошон хәрби хеҙмәткә бағы­шланы. Күптәре артабан Рәсәй Эске эштәр ми- нистрлығының Өфөләге юридик институтында, Силәбе, Рязань, Краснодар, Санкт-Петербургтағы юғары хәрби уҡыу йорттарында уҡыуҙарын дауам итә, - ти корпус начальнигы Венер Рәйес улы Сәмиғуллин. - Былтыр, мәҫәлән, 43 сығарылыусы­ның бишәүһе хәрби юғары уҡыу йорттарына уҡы­рға инде, 12-һе граждандар ВУЗ-дарына, ә 14-е - Рәсәйҙең Ҡораллы көстәре сафтарына хеҙмәткә саҡырылды.

Кадет корпусын отставкалағы майор Венер Рәйес улы Сәмиғуллин етәкләй. Ул үҙе Свердлов ҡалаһы­ның Л. И. Брежнев исемендәге юғары хәрби-сәйәси танк- артиллерия училище­һын тамамлаған. 1318-се айырым десант-штурмлау полкының парашют-десант ротаһында ко­мандир урынбаҫары булып хеҙмәт иткән.

Кадеттар нисек йәшәй, тиһегеҙме? Эйе, улар­ҙың көн тәртибе беҙҙекенән ныҡ айырыла. Иртән­ге сәғәт 7-лә улар йоҡонан тора, көн дә йүгерергә сыға. Аҙаҡ - дәрестәр, күнекмәләр, төрлө мәҙәни һәм спорт сараларында ҡатнашыу, дәрес әҙерләү, йәшәгән бүлмәне, синыф бүлмәләрен йыйышты­рыу (эйе, кадет тәртип һаҡлай белергә лә тейеш!). Көндөң нисек үткәне лә һиҙелмәй ҡала - киске сәғәт 10-да һалдаттарса “отбой” командаһы аҫтында улар “әүен баҙары”на юллана. Ҡалай ре­жимдары ҡаты тиһәгеҙ ҙә, бының яҡшы яҡтары байтаҡ: үҫмер холҡонда ғүмерлеккә теүәллек, тәртип яратыу, эштәрен ваҡытында башҡарыу кеүек сифаттар тәрбиәләнә.

- Беҙҙә кадеттар физик әҙерлек күнекмә­ләрендә етди шөғөлләнә. Гер спортынан Радик Мәҙис улы Хөсәйенов күнектерһә, ҡул һуғышы буйынса үҫмерҙәрҙе инструктор Иванов Юрий Александрович, физик культура буйынса педаго­гик фәндәр кандидаты Дорин Александр Васи­льевич өйрәтә. 20 йыл эсендә кадет корпусында 2 халыҡ-ара кимәлдәге спорт мастеры, 20 ма­стер һәм спорт мастерына кандидат тәрбиәлән­де. Үҫмерҙәр йыл һайын ГТО нормативын ташыра. Корпус тәрбиәләнеүселәр - Алексей Алексеев ике тапҡыр Мәскәү марафонында еңһә, Андрей Сафронов 2016 йылда Ҡаҙанда үткән универсиадала ҡатнашты, ти - Венер Рәйес улы.

Мәләүез кадет корпусында һәр кадет күңе­ленә Тыуған ил, уға һөйөү, хөрмәт кеүек төшөн­сәләр һалына, илдең хәрби тарихы өйрәнелә. Ана шул төшөнсәләр үҫмерҙе шәхес итеп тәрбиәләүҙә бик ҙур роль уйнай. Фильмдарҙағы супергеройҙар бындай ысын ил­һөйәрҙәр алдында ҡурсаҡ кеүек кенә. Сөнки тормошон хәр­би хеҙмәт менән бәй­ләгән кешегә ғүмерен ҡурҡыныс аҫтына ҡу­йып, кешеләрҙе ҡот­ҡарырға тура килә. Кадет корпусын та­мамлаусылар Төньяҡ Кавказдағы, Сириялағы, Грузиялағы хәр­би операцияларҙа, Ҡырымдың Рәсәйгә ҡушылыуында ҡатнашҡан. Күптәре орден, миҙал­дар менән бүләкләнгән.

Кадеттар Рәсәй армияһының иң көслө ғәскәр­ҙәренең береһе - Һауа-десант ғәскәре ветеран­дарын ҡотлау тантанаһында бик теләп ҡатнаша. 2018 йылдың сентябрендә корпус, “Десант бер­ҙәмлеге” ветерандар ойошмаһы менән берлектә, Советтар Сюзы Геройы, армия генералы Василий Маргеловтың һәйкәлен асыуҙа ҡатнашты. Хәҙер корпусҡа уҡырға алынған һәр кадет ошо һәйкәл эргәһендә тантаналы вәғәҙә бирә.

Шундай сәләмәт рухлы кадеттар барлығында илебеҙгә бер ниндәй ҙә хәүеф янамаҫ, тип ыша­набыҙ.

Миләүшә БАЙЪЕГЕТОВА.