Шайморатовтың тыуған көнөнә байрам ойошторола

27 августа, Рәсәй Геройы, генерал Миңлеғәли Шайморатовтың тыуған көнөндә, «Родина» кинотеатрында “Тамыр” телеканалы тарафынан Башҡортостан Башлығы гранттары фонды һәм Мәғариф һәм фән министрлығы ярҙамында әҙерләнгән "Ат уйнатып" хәрби-патриотик уйынының исем туйы үтәсәк.

Күләмле проект былтыр булдырылғайны. Шайморат кластары уҡыусылары, бөтә республиканан 16 команда, Өфөнөң тарихи үҙәгендә  ҡатмарлы һәм ҡыҙыҡлы квеста ҡатнашты. Бынан тыш, "Тамыр" телеканалы «Ат уйнатып. Командирҙар алышы» өҫтәл уйынын булдырған. Өс ай дауамында БСТ һәм "Тамыр" каналдарында бөтә республика шайморатовсыларҙың командирҙарының уйынын күҙәтте. “Ат уйнатып” хәрби-патриотик уйынының өсөнсө этабы “Патриот” хәрби-патриотик паркында үтте. Биш команда, Стәрлетамаҡ ҡалаһының Жәлил Кейекбаев исемендәге 3-сө гимназияһы, Күгәрсен районы Мораҡ ауылының М.Ғ. Рәхимов исемендәге башҡорт гимназияһы, Туймазы ҡалаһының 1-се гимназияһы, Өфөнөң 2-се “Смарт” республика күп полилингваль гимназияһы уҡыусылары тәүге этаптарҙы уңышлы үтте һәм финалда көс һынашты.

Финал этабы барышында 7 сериянан торған “Ат уйнатып” патриотик реалитиһы төшөрөлдө. Уның премьераһы 27 августа 16.00 сәғәттә “Родина” кинотеатрында үтәсәк. Ойоштороусылар балаларға уйындар, приздар һәм шайморатовсылар менән осрашыу вәғәҙәләй.

Шул уҡ аҙнала БСТ һәм Тамыр телеканалдарында «Ат уйнатып» патриотик реалитиһы күрһәтелә.

6+

Автор: Ләйсән Закирова