“Әсәй” тигән оло һүҙҙе
Тәү башлап әйтә бала.
Әсәләрҙәй изге йәндәр,
Юҡтыр ул был донъяла!
Төндәр буйы йоҡламайса,
Әкиәт һөйләгән – әсә.
– Үҫ, балам, үҫ тиҙерәк, – тип,
Көйҙәр көйләгән әсә. (Т.Муллағәлиева)
Әсәй, әсәйем, әсәкәйем! Шундай мәғәнәле, наҙлы, һоҡландырғыс, уйландырғыс һүҙҙәр. Әсә, бары тик әсәй генә иң яҡшы серҙәш тә ул, һине ел-дауылдарҙан ҡурсалар, һәр ерҙә ярҙам ҡулын һуҙыр, ә иң мөһиме бар күңеле менән һине яратыр.
Минең иң яҡын кешем, аҡ фәрештәм, берҙән-берем, әсәйем – Дәүләтшина Гөлнара Әхмәт ҡыҙы. Эйе, минең аҡ фәрештәм, сөнки бары тик әсәйем генә мине бер ҡараштан аңлап тора.
Әсәйем Бөрйән районы Әбделмәмбәт мәктәптә тырышып уҡыған. Ул апайҙарынан үрнәк алған һәм һеңлеләренә, ҡустыларына терәк таяныс, үрнәк булған. Минең әсәйем эшкә бик әүәҫ. Уның ҡулынан килмәгән эше юҡ. Үҙе телеңде йоторлоҡ тәмле-тәмле ризыҡтар бешерә. Шулай уҡ ул ҡышҡылыҡҡа йөн ойоҡтар, күҙҙең яуын алырлыҡ матур-матур түшәктәр бәйләй. Әсәйем беҙҙе лә бәйләргә, тәмле ризыҡтар бешерергә өйрәтә. Әсәйем атайым менән биш балаға яҡшы тәрбиә бирәләр. Бөгөнгө көндә атайым менән әсәйем олатай һәм өләсәй ҙә. Әсәйем Байназар балалар баҡсаһында тәрбиәсе ярҙамсыһы булып эшләй, үҙ эшен яратып, бар күңелен һалып башҡара.
Әсәйем һәр баланы ихлас күңелдән ярата. Шуға күрә лә балалар менән бик тиҙ уртаҡ тел таба һәм балалар ҙа уға тартылып тора. Әсәйемә матур байрам уңайынан йылы һүҙҙәремде еткерәм. Был һүҙҙәр донъялағы барлыҡ әсәйҙәр өсөн дә яңғыраһын ине. Рәхмәт, әсәй, һиңә барыһы өсөн!!! Һинһеҙ, һинең йылы ҡараштарһыҙ, аҡыллы кәңәштәрһеҙ мин был донъямды күҙ алдына ла килтерә алмайым. Хоҙайға меңдән-мең шөкөр, минең шундай яғымлы, көләс, егәрле, һөйкөмлө әсәйем булғанға!!! Һинең һәр һүҙең миңә ҡәҙерле. Кәңәштәрең һәр ваҡыт ярҙамсы тормош юлымда. Тик һинең тәрбиәң генә беҙҙе аҡыллы, ихлас күңелле, ғәҙел итеп яралтҡандыр. Ҡайһы саҡта үҙем дә уйламай әйткән һүҙҙәрем өсөн ғәфү ит!!! Кис йоҡларға ятҡанда һәр саҡ иң беренсе һинең һаулығыңды, ҡыуанып йәшәүеңде теләйем. Һин ҙур бәхеткә лайыҡ кеше. Һинең ҡыуаныстан йылмайыуыңды, шатлыҡ осҡондары сәсеп торған күҙҙәреңде күреү, шат тауышыңды ишетеү – минең өсөн оло бәхет!!! Һәр саҡ йылмайып, ҡыуанып йәшә, әсәкәйем, берҙән-берем!!! Мин һине ныҡ итеп яратам!!!
Сәлимә ДӘҮЛӘТШИНА,
Бөрйән районының Байназар мәктәбе уҡыусыһы.