Бесәй менән терпе дуҫлығы

Бесәй менән терпе дуҫлығы

 Борон-борон заманда, зәңгәр диңгеҙ артында, ҡара урман эсендә йәшәгән, ти, әбей менән бабай. Уларҙың булған, ти, бик иркә генә ап-аҡ бесәйҙәре. Ул күберәк тышта йөрөргә ярата башлаған да хужалары уға асыуланып:

• Ҡайтып йөрөмә, – тигәндәр.

Сығып киткән, ти, Һороҡай. Эй бара ти, эй бара был. Бара торғас, оҙон юл үткән, энә ҡәҙәр ер киткән, ти.

Юлда уға бер терпе осраған. Улар дуҫлашып алып, бергә йәшәй башлағандар, ти.

Терпенең тылсымлы быяла шары булған икән. Берҙән-бер көндө ул бесәйгә:

• Әйҙә, тылсымлы шарың менән ҡарап киләйек әле, әбей менән бабайың ни эшләй икән? – тигән.

Ә шар күрһәтә икән: әбейҙең йорт тирәләрен сысҡандар баҫҡан. Бесәй быны күреп түҙмәгән, терпе менән хушлашып, әбей менән бабай янына ҡайтырға булған.  Быға терпе:

• Әйҙә икәү барайыҡ, мин дә ярҙам итермен,–тигән.

Былар икәүләп тиҙ арала сысҡандарҙы ҡырып һалғандар икән. Әбей менән бабай бик шатланғандар, бесәйҙәрен тиргәгәнгә үкенгәндәр. Әлбиттә, бесәй уларға асыу һаҡламаған. Терпе менән икеһе китергә булғандар. Тик терпе былай тигән:

• Һәр кем үҙ урынында булырға тейеш: һин ауылда ҡал, мин тәбиғәт ҡосағында йәшәйем. Ваҡыты-ваҡыты менән килеп, һеҙҙең хәлде белеп торормон, – тигән терпе.

Шул ваҡыттан алып, терпеләр ауылға хәл белергә килеп сыҡҡылай икән.

Илназ Мәрҙәнов,

Борай 2-се һанлы гимназияһы уҡыусыһы. Етәксе –Ләйсән Ришат ҡыҙы Муллағәлиева