Йоҡо! Йоҡо!

Концертҡа билет алғайным. Көн һыуытып ебәргәс, такси саҡырттым. Ул килгәнсе башымды диванға терәп торғайным, йоҡлағанмын да кит­кәнмен. Бер сәғәт үткән... Тағы шылтыратам:
– Мин такси саҡыртҡайным. Уны көткән арала йоҡлағанмын да ҡуй­ғанмын. Яңынан машина ебәрегеҙ инде?!.
– Ярай, беҙҙең шылтыратҡанды көтөгөҙ.

Заказ бирҙем дә, машина килгәнсе тип, башымды тағы ла мендәргә терәнем. Тағы ла йоҡлағанмын. Йәнә таксиға шылтыратам. Заказдар ҡабул итеүсе ҡыҙ рәхәтләнеп көлә:
– Өйөгөҙ янында һеҙҙе шул уҡ машина көтә. Сыҡҡанығыҙҙы көтөп ултыра торғас, водитель дә ҡаты йоҡлаған.