“Һомай” аҡыллы колонкаһын отоғоҙ!

“Аманат” журналы “Башланып китте уҡыуҙар...” фотоконкурсын иғлан итә. Үҙегеҙҙең уҡыу йылы башында төшкән синыфташтарығыҙ, уҡытыусы, ата-әсәләр, туғандар менән сифатлы, оригиналь фотоларығыҙҙы беҙгә ебәрегеҙ. Конкурста коллектив менән генә түгел шәхсән ҡатнашыуы ла мөмкин. Эштәр 11 сентябргә хәтлем ҡабул ителә. 12-20 сентябрь асыҡ тауыш биреү беҙҙең "Бәйләнештә" сайтындағы төркөмөндә барасаҡ.

Еңеүсегә Рәхмәт кәлимәһе һәм “Һомай” аҡыллы колонкаһы!

Әйткәндәй, башҡортса аҡыллы колонка әлегә һатыуҙа юҡ. “Һомай” аҡыллы колонкаһын булдырыу проекты – Башҡортостан халыҡтары телдәрен һаҡлау һәм үҫтереү өсөн бүленгән гранттар конкурсы еңеүселәренең береһе.

– Идеяны тормошҡа ашырғансы күп ваҡыт һәм көс һалынды, – тип һөйләне проект етәксеһе Айгиз Ҡунафин. – Тел моделен камиллаштырыу, тауыш яҙҙырыу, телмәр синтезы, тауышты текстҡа әйләндереүҙең сифатын яҡшыртыу, колонканың корпусын, тышҡы биҙәлешенең дизайнын әҙерләү, һәм башҡалар – былар барыһы ла бер көнлөк кенә эш түгел.

Айгиз колонкаға эйә булған педагогтарға уны ҡулланыу нескәлектәрен ентекле аңлатты. Тиҙҙән “Һомай"ҙы һатыуға сығара башларға ниәтләйҙәр. “Һомай” менән башҡортса һәм русса аралашырға, һорауҙар бирергә һәм тулы яуаптар алырға ғына түгел, ә еңел генә башҡорт телен өйрәнергә була. Уның менән кескәй балаларҙан алып өлкәндәргә тиклем ҡуллана ала.

Фотоконкурсҡа эштәрҙе [email protected] почтаһына, https://vk.com/amanatrb сәхифәһенә йәки 89371564655 (Рәзил Бикбулатов) телефонына ебәрә алаһығыҙ