Беҙҙең һөйөү тарихы-2 (дауамы)

Заһит менән беҙ шунда уҡ дуҫлашып китмәнек. Ул миңә “Бәйләнештә” сайтында яҙҙы ла яҙҙы, телефонымдың номерын һораны. Әммә мин уның хаттарына яуап бирмәнем. Сәбәбе лә яп-ябай...

МС Баш миңә бөтөнләй оҡшамай!

Ниһайәт, яңы, 2013 йыл тыуҙы. Ҡышҡы каникул мәле. Өсөнсө курстың яртыһы үтеп тә киткән. Мин, ғәҙәттәгесә, мунсанан һуң, дуҫ ҡыҙҙар янына ашығам.

Телефоныма тағы ниндәйҙер хәбәр килде. Йылға буйындай оҙон хат ебәреп, Заһит мине Яңы йыл менән ҡотлаған икән. Аҙағында: “Мин ауылдамын. Номерыңды ебәр әле?!.” – тип өҫтәп ҡуйған. Ни булһа ла булыр тип, номерымды яҙҙым да ебәрҙем. Заһит шунда уҡ миңә шылтыратты. Уртаҡ танышыбыҙ булған минең әхирәт ҡыҙҙы алып, өсәүләшеп машинала йөрөп килергә саҡырҙы.

Бөрйән районын ҡышҡы кистә күргәнегеҙ бармы? Ана шул матурлыҡта йөҙөп, ауылдар буйлап, машинала елдерҙек. Заһитҡа ниндәйҙер һут кәрәк булды, магазиндар буйлап шуны эҙләп, мәж килдек. Ысынында уға бер ниндәй ҙә һут кәрәкмәгән булып сыҡты. Ул, баҡтиһәң, минең менән яҡындан танышыу өсөн шулай ҡыланған икән!

Таңға ҡарай ғына өйгә ҡайтып еттек.

Иртәгәһен кисен дә өсәүләшеп Бөрйән юлдарын “таҡырайттыҡ”. Ә өсөнсө кистә ул мине генә саҡырып сығарҙы. Яйлап, ул минең ышанысымды яулай башлағайны инде. Хатта оҡшай ҙа башлаған кеүек… Заһит менән аралашыу күңелдә ниндәйҙер рәхәт тойғолар уятты. Йөҙ йыл танышбыҙмы ни?!

Шулай итеп, ҡышҡы каникулды беҙ бергә үткәрҙек. Бер заман, 6 ғинуар ине ул көн, Заһит мине үпте. Ә мин… ҡойолоп төшөп, илап ебәрҙем. Сөнки ул ваҡытта минең, ситтән тороп, инде 5 йыл дуҫлашҡан егетем бар ине. Ул егет менән күрешмәһәк тә, үҙемде хыянатсы кеүек тойҙом һәм был минең өсөн ифрат ауыр һынау булды.

Каникул бөтөп, кире Өфөгә килгәс, мине әйтеп бөтөрә алмаҫлыҡ һағыш биләп алды. Мин үҙемдең ғашиҡ булыуымды аңланым. Ике ут уртаһында яныуымды тик үҙем генә белдем. Заһитҡа ла еңел булмағандыр. Сөнки ул ваҡытта йырсы Анжелика Якусева менән йөрөй ине. Ул үҙенең ҡыҙы тураһында миңә – ләм-мим, ә мин, алыҫтағы егетемде уйлап, ни эшләргә белмәнем.

Шуны әйтеп үтергә кәрәк: тәүге курстан алып мин, уҡыу ваҡытында бер ҡайҙа ла сығып йөрөмәнем, бар ваҡытымды уҡыуға бағышланым. Сөнки медицина университетында уҡыу, унан да бигерәк тик яҡшы билдәләргә өлгәшеү өсөн күп уҡырға, ятларға, аңларға кәрәк. Ғөмүмән, урамда йөрөү, осрашыуҙарға сығыу тигән нәмәләр ят булды миңә. Һәм… уйламағанда, минең күңелһеҙ тормошома сағыу төҫтәр өҫтәп, МС Баш килеп инде.

Беҙ көн дә осраштыҡ, телефондан сәғәттәр буйы һөйләштек. МС Баш кистәрен баш ҡала сәхнәләрендә сығыш яһай, ә мин тамаша залында уны

көтәм (эргәһенә бара алмайым, кешегә һиҙҙермәҫкә, тип алдан һөйләшеп ҡуйғайныҡ). Шулай итеп, аҙна һайын дискотекаларға йөрөй башланым. Быны белеп ҡалған теге ситтәге егетем ныҡ аптыраны, миндәге кинәт кенә үҙгәрештәрҙе ауыр ҡабул итте. Әммә мин үҙем менән бер нәмә лә эшләрлек хәлдә түгел инем.

Был ҡылығым өсөн хәҙер үкенмәйһеңме, тип һорарһығыҙ. Юҡ, һис тә үкенмәйем. Сөнки тап ошо осорҙа тормошом сағыу төҫтәргә мансылды, ысын һөйөүҙең нимә икәнлеген аңланым.

Ваҡыт үтә торҙо, мин, Заһитты яратыуымды аңлап, артабан былай булмай тип, теге егетте ташланым. Әммә Заһит Анжеликаны ҡалдырырға уйламай ине – минең өсөн был бик ауыр булды. Һөйөү утында ғазапланған ошо осорҙа мин тәү тапҡыр МС Баштың йырҙарын тыңлай башланым.

Сабырлыҡ, үҙеңдекен көтә белеү – оло бәхеттең нигеҙе икәнлеген тойғанмындыр, күрәһең. Уҡыуымды тамамлап, Себергә киттем. Заһит шул мәлдә бик мөһим ҡарарға килде – минең тыуған көнөмдә Сургутҡа килеп, миңә үҙенә кейәүгә сығырға тәҡдим итте. Бәхетемдең етенсе ҡатында булдым ул ваҡытта! Әлбиттә, мин уға “Эйе” – тинем һәм тормошомда сираттағы хәл иткес аҙымды, бәхетле йылмайып, яһаным.

Беҙҙең биш йыллыҡ дуҫлашыуыбыҙ миңә бик фәһемле һабаҡ бирҙе: бәхетле булыр өсөн сабыр ҙа, ҡайһы ваҡытта ҡыйыу аҙымдарҙан ҡурҡмаҫҡа ла кәрәк. Бәхетле булығыҙ, ҡыҙҙар, егеттәр!

ФИЗӘЛИӘ.

Дуҫтар, серҙең башын https://amanat.rbsmi.ru/articles/m-gelek-ser/Be-e--y--tarihi-318175/ һылтанмаһы аша инеп, уҡый алаһығыҙ.

Читайте нас:

© 2008-2024 «Аманат» Республика балалар-үҫмерҙәр журналының сайты. Сайт Республиканского детско-юношеского журнала «Аманат». Ойоштороусылары: Башҡортостан Республикаһының Матбуғат һәм киң мәғлүмәт саралары буйынса агентлығы; Башҡортостан Республикаһының "Республика Башкортостан" нәшриәт йорто дәүләт унитар предприятиеһы. Учредители: Агентство по печати и средствам массовой информации Республики Башкортостан; Государственное унитарное предприятие Республики Башкортостан Издательский дом "Республика Башкортостан".

Телефон

8 (347) 246-31-05

Электрон почта

[email protected]

Адресы

450079, Республика Башкортостан, г. Уфа, ул. 50-летия Октября, 13, 7 этаж

Редакция

8 (347) 246-31-05

Ҡабул итеү бүлмәһе

8 (347) 246-31-05