Рәсәй Ғәҙәттән тыш хәлдәр министрлығының Башҡортостан идаралығынан хәбәр итеүҙәренсә, бөгөн Өфөнөң Блюхер урамындағы 66-сы балалар баҡсаһында янғын сыҡҡан. Сәбәбе – бинаның подвалында урынлаштырылған кер йыуыу машиналарының янып китеүе.
Ваҡиға тураһында белдереп, ашығыс хеҙмәттәргә телефондан 12 сәғәт 55 минутта шылтыратҡандар. Утҡа ҡаршы көрәшергә 24 янғын һүндереүсе, 7 махсус автомашина йәлеп ителгән, шулай уҡ полиция хеҙмәткәрҙәре, медицина белгестәре, газ буйынса яуаплы кешеләр саҡыртылған. Нисәлер минут эсендә ялҡын баҫтырылған, тағы ла аҙмы-күпме ваҡыттан һис бер хәүеф ҡалмаған.
Ярҙам килеп еткәнсе балалар баҡсаһының янғын бригадалары сабыйҙарҙы бинанан үҙ аллы сығарып бөткән һәм 120 метр ғына алыҫлыҡтағы 99-сы мәктәптең ашханаһына индереп торған булған. Йәмғеһе 48 бала һәм 13 оло кеше эвакуацияланған.
Ҡәҙерле дуҫтар! Ә һеҙҙең мәктәптәрҙә хәүефһеҙлек ҡағиҙәләре теүәл үтәләме? Янғын сыҡҡан хәлдә ни эшләргә беләһегеҙме?
Шуны белегеҙ: ут бер нәмәне лә аямай! Һаҡ булығыҙ!
Ошо телефон һандарын хәтерегеҙҙә ҡалдырығыҙ:
Ашығыс медицина ярҙамы – 03,
Кеҫә телефоны аша ярҙам саҡыртыу өсөн дөйөм һан – 112.