Ер йөҙөндәге бөтөн баларға ла ярҙам итергә теләйем…

Журналыбыҙҙың “Бәйләнештә” сайтындағы төркөмөбөҙҙә барған "Оҙонсәс" конкурсы еңеүсеһе Азалия Фәррәхова Туймазы районы Серафимовка ауылының 3-сө мәктәбенең 3-сө "Б" синыфында белем ала. Сәсе уның ысынлап та бик оҙон – 109 сантиметр!

Йола буйынса еңеүсе менән әңгәмә ҡорҙоҡ.

– Азалия, һине “Оҙонсәс” конкурсында еңеүең менән ҡотлайбыҙ! Сәсеңдең оҙонлоғо – метрҙан ашыу. Нисә йәшеңдән үҫтерәһең был матурлыҡты?

– Мин конкурста еңеүемә бик шатмын! Сәсемде ғүмеремдә бер тапҡыр ҙа киҫтергәнем юҡ. Бөҙрәханаға барһам, ни бары остарын ғына тигеҙләтеп ҡайтам.

–Сәстең оҙонлоғона тәьҫир итә торған шампун, майҙар ҡулланаһыңмы?

– Юҡ, ябай шампунь менән генә йыуам. Сәсемдең оҙонлоғо нәҫелдән киләлер инде. Мин өләсәйемә оҡшағанмын. Уның сәсе лә бәләкәй саҡта оҙон, ҡалын булған.

- Беҙгә яҙған хатыңда “Мин әсәйемә оҡшарға теләйем” тип яҙғайның. Әсәйең менән һеҙ яҡын серҙәшме?

- Доньялағы иң яҡын кешем – әсәйем. Мин әсәйемә оҡшарға теләйем. Уның кеүек тәмле итеп бәлештәр, ҡоймаҡ бешерергә өйрәнәм.

- Сәсеңде ул үрәме, әллә үҙеңме?

- Сәсемде әсәйем үргәнен бик яратам. Уның ваҡыты булмаһа, үҙем дә үреп ҡуя алам. Бигерәк тә мәктәпкә икегә бүлеп, үреп йөрөргә яратам.

– Дәрестән ҡайтҡас, буш ваҡытыңды нисек уҙғараһың?

– Дәрестән ҡайтҡас, мин әсәйемә ярҙам итәм. Һүрәт төшөрәм, алмас мозаика төҙөү ҙә бик оҡшай. Тағы ла инглиз телен өйрәнәм.

- “Аманат” журналындағы конкурстарҙа бик әүҙем ҡатнашаһың. Мәктәптә лә һин шулай әүҙем уҡыусыһыңмы?

- Эйе, мин мәктәптә үткәрелгән бөтә конкурстарҙа ла ҡатнашып барырға тырышам.

- Ә киләсәк тураһында уйлағанда һин үҙеңде кем итеп күҙ алдыңа килтерәһең? Сер булмаһа, хыялдарың менән дә уртаҡлаш әле.

- Мин үҙемде киләсәктә табип итеп күрәм. Ер йөҙөндәге бөтөн баларға ла ярҙам итергә теләйем.

Тағын бер тапҡыр еңеүең менән ҡотлайбыҙ! Һиңә гел уңыш йылмайып торһон!

Миләүшә БАЙЪЕГЕТОВА әңгәмәләште.

Читайте нас:

© 2008-2024 «Аманат» Республика балалар-үҫмерҙәр журналының сайты. Сайт Республиканского детско-юношеского журнала «Аманат». Ойоштороусылары: Башҡортостан Республикаһының Матбуғат һәм киң мәғлүмәт саралары буйынса агентлығы; Башҡортостан Республикаһының "Республика Башкортостан" нәшриәт йорто дәүләт унитар предприятиеһы. Учредители: Агентство по печати и средствам массовой информации Республики Башкортостан; Государственное унитарное предприятие Республики Башкортостан Издательский дом "Республика Башкортостан".

Телефон

8 (347) 246-31-05

Электрон почта

[email protected]

Адресы

450079, Республика Башкортостан, г. Уфа, ул. 50-летия Октября, 13, 7 этаж

Редакция

8 (347) 246-31-05

Ҡабул итеү бүлмәһе

8 (347) 246-31-05