"Ҙур рәхмәт һеҙгә!"

Билдәле булыуынса, улар Ҡатын-ҡыҙҙар хоккей лигаһында икенсе тапҡыр чемпион исемен яуланы. Санкт-Петербургтың “Динамо” командаһын финал уйындары серияһында 4:1 иҫәбе менән еңделәр!

Башҡортостан Башлығы вазифаһын ваҡытлыса башҡарыусы Радий Хәбиров “Ағиҙел”дәргә тотош республика халҡы исеменән рәхмәт белдерҙе.

“Шундай йәш, матур ҡыҙҙар беҙгә оло шатлыҡ бүләк итте, ҙур рәхмәт һеҙгә. Еңеүегеҙ республикабыҙға дан өҫтәне, – тине Радий Фәрит улы. – Төбәгебеҙҙә ҡатын-ҡыҙҙар хоккейы лайыҡлы урын биләй: команда бар, һоҡланғыс тренер коллективы һәм еңеүҙәр тарихы бар. Ҡатын-ҡыҙҙар хоккейын үҫтереүҙе дауам итәсәкбеҙ, финанс йәһәттән бурыстарыбыҙ үтәләсәк. Республикала хоккей буйынса донъя чемпионаты үтәсәк – был ваҡиға беҙҙең маҡсаттарға тағы ла ҙурыраҡ этәргес бирер. Һеҙҙең арала Рәсәй йыйылма командаһына кандидаттар барлығына ышанам. Шулай уҡ тиҙҙән спортсыларҙың яңы быуыны барлыҡҡа килеренә өмөт ҙур. Ғөмүмән, республикабыҙҙы ҙур еңеүҙәр көтә”.