Бөтә яңылыҡтар
Спорт
21 Октябрь 2019, 13:13

Уҡыусы малай ат ярышында еңеп 150 мең һум аҡса отто

Күгәрсен районының Үрге Сирбай ауылынан 13 йәшлек Динис Ҡорбанаев, тәжрибәле һәм өлкән дәғүәселәрен уҙып китеп, «Терра Башҡортостан» ат-спорт турнирында чемпион булды.

Еңеүсегә Чемпион кубогы һәм республика башлығынан 150 меңлек аҡсалата бүләк тапшырылды. Ҡорбанаевтар ғаиләһе аҡсаны яңы аттар өсөн тотонорға, ә Динискә яңы мобиль телефон һатып алырға ниәтләй.


Йәш чемпионда ат сабышына ҡарата һөйөүҙе атаһы тәрбиәләгән. Ул - йылҡысы, бер йәшенән үк улын үҙе менән бергә һыбай йөрөткән. Динистең әсәһе һөйләүенсә, улы аттарҙан тыш (хужалыҡта улар 20-нән ашыу), эт-бесәйҙәрҙе лә ярата. Эйәһеҙ хайуандарҙы өйөнә алып ҡайта һәм ата-әсәһен уларҙы үҙҙәрендә ҡалдырыуҙы һорай. Шуға күрә хәҙер Ҡорбанаевтар йортонда бер нисә эт һәм бесәй йәшәй.


Мәктәпте тамамлағас, Динис ветеринарға уҡырға һәм ярыштарҙа ҡатнашыуын дауам итергә йыйына.


Сығанаҡ: Башинформ