«Рәсәй – спорт державаһы» халыҡ-ара спорт форумы

17-19 октябрендә Өфөлә «Рәсәй – спорт державаһы» халыҡ-ара спорт форумы үтәсәк. Илдең төп спорт форумы Башҡортостанда Рәсәй Президенты Владимир Путин ҡарары буйынса ойошторола.

Төп саралар 2024 йылдың 31 авгусында Өфөнөң 450 йыллығына асылған Көрәш һарайы базаһында үтә. Бында пленар өлөш, форумдың эшлекле программаһы һәм Рәсәй Президенты ҡарамағындағы Физик культураны һәм спортты үҫтереү буйынса совет ултырышы үтәсәк. Бина эргәһендә «Заманса спорт. Инновациялар һәм перспективалар» күргәҙмәһе өсөн ваҡытлыса конструкциялар ҡуйыла, унда алдынғы спорт төбәктәре һәм ойошмалары тәҡдим ителә.

Бынан тыш, Башҡортостан баш ҡалаһының башҡа спорт объекттарында ла төрлө ярыштар үтә. Мәҫәлән, «Өфө-Арена»ла «IBA чемпиондары төнө» профессиональ бокс кисәһе һәм юниорҙар араһында кёрлинг буйынса Бөтә Рәсәй ярыштары уҙғарыла. 17 октябрҙә «Динамо» спорт комплексында баскетбол буйынса Рәсәй Чемпионатының «Юғары лига» матчы ойошторола. «Ватанды һаҡлаусылар кубогы» төбәк-ара ярыштарында ҡатнашыусыларҙы Рима Баталова исемендәге Спорт әҙерлеге үҙәге ҡабул итә. Шулай уҡ форум барышында Ишкәкле слалом комплексын һәм Фехтование үҙәген асыу тантанаһы планлаштырылған, унда «Ҡурай иле» халыҡ-ара ярыштары һәм юниорҙар араһында «Салауат ҡылысы» ярыштары үтәсәк.

19 октябрҙә Өфөлә Рәсәй Олимпия комитеты менән берлектә «Йәйәү йөрөү көнө» үткәреләсәк. Сарала 25 мең самаһы кеше – форумда ҡатнашыусылар, 200 Олимпия уйындары чемпионы һәм призеры, Өфө халҡы һәм ҡунаҡтарының ҡатнашыуы көтөлә. Улар «Спорт» туҡталышынан Ленин майҙанына тиклем 2 км араны атлап үтәсәк.

Форумдың һуңғы көнө, 19 октябрь, Башҡортостандың спорт берләшмәһенә арнала. Программала Физик культура һәм спорт буйынса төбәк советының киңәйтелгән ултырышы, шулай уҡ республиканың спорт йәмәғәтселеге һәм Өфө халҡы өсөн асыҡ ишектәр көнө ҡаралған.

Был быйыл республикабыҙ өсөн иң ҙур сараларҙың береһе. Донъяның 100-ҙән ашыу иленән делегациялар – меңләгән ҡунаҡтар, шул иҫәптән билдәле спортсылар килеүе күҙаллана.