Өфөлә “Рәсәй мәктәп яҙы” фестиваленең гала-концерты булды

Кисә Өфөнөң  “Торатау” конгресс-холында “Рәсәй мәктәп яҙы”ның төбәк этабын йомғаҡлау гала-концерты булды. Был фестивалде Беренселәр Хәрәкәте флагман проекты сифатында тормошҡа ашыра. Уның барышында йәш таланттарға ҙур сәхнәләргә юл асыла. Республика ҡала һәм райондары этабында фестиваль 2 меңләгән баланы берләштерҙе.

Төбәк этабында Гран-при алыусылар:

“ТАЙФУН” ВОКАЛЬ ДУЭТЫ (Өфө).

“Инструменталь башҡарыу” номинацияһында:

ИВАН ПЕТРАЕВ (Ҡалтасы районы).

“Бейеү сәнғәте” номинацияһында:

“РОБОБАНДА” КОЛЛЕКТИВЫ (Өфө).

“Театр сәнғәте” номинацияһында:

ТИМУР ҒИЛМАНОВ (Октябрьский).

“Мода” номинацияһында:

“ВИВЬЕН” КОЛЛЕКТИВЫ (Саҡмағош районы).

“Оригиналь жанр” номинацияһында:

“ЙӘШ БАРАБАНСЫ ҠЫҘҘАР” (Балтас районы).

Гала-концерт ҡунаҡтары  өсөн ижад һәм күңел асыу зоналары эшләне, “Көйҙө таны” музыкаль викторинаһы, “Үҙеңде һына” бейеү зонаһы, алдан әҙерләнмәгән сәхнә күренештәре күрһәтеү, көйәрмәндәр арт-мөхите гөрләне. Бик әүҙем ҡунаҡтарҙы  “Беренселәр дебаттары”на саҡырҙылар, унда ҡатнашыусылар бирелгән тема буйынса фекерҙәрен әйтте һәм дәлилдәр килтереп яҡланы.

Фестивалдең иң яҡшы сығыштары федераль кимәлгә тәҡдим ителәсәк.  Ул май айында Ставрополь ҡалаһында үтәсәк.

Былтыр Башҡортостан уҡыусылары, ил кимәлендә абсолют еңеү яулап, Гран-при алып ҡайтҡайны.

ФОТО: БР Йәштәр сәйәсәте министрлығы / матбуғат хеҙмәте.

Сығанаҡ: Башинформ.