Рособрнадзор БДИ-ны ватан программа тәьминәтенә күсерә

Имтихандың бөтә пункттарын тулыһынса ватан программа тәьминәтенә күсереү 2027 йылға билдәләнгән.

Рособрнадзор БДИ-ҙы Linux операцион системаһында үткәрәсәк программа тәьминәтенең эшен һынауҙы ойошторған.

Күнекмәлә илдәге һәм сит илдәрҙәге 1346 имтихан үткәреү пунктының 28 мең белгесе ҡатнашҡан. Сара барышында, Linux ОС-ын ҡулланып, имтихан материалдарының тулы комплектын һаҡлаулы интернет-каналдар аша тапшырыу, пункттарҙағы аудиторияларҙа имтихан материалдарын баҫыу һәм сканлау башҡарылған.

Күнекмәләр уҡыусылар ҡатнашлығынан тыш үткән.

"Яңы системаға күсеүҙең төп маҡсаты – технологик бойондороҡһоҙлоҡто тәьмин итеү һәм имтихандарҙың мәғлүмәти хәүефһеҙлеге кимәлен күтәреү. Был имтихан материалдарын имтихан үткәреү пункттарына тапшырыуҙы һәм эшкәртеүҙе көйләйәсәк", – тигәндәр ведомствола.

Тикшереүҙе уңышлы үткән төбәктәр яңы операцион системаны 2026 йылда уҡ ҡуллана аласаҡ, ә тулыһынса күсеү 2027 йылға тәғәйенләнгән.

Фото: «Башинформ» / архив

Сығанаҡ: Башинформ.