+21 °С
Ямғыр
Бөтә яңылыҡтар
Дөйөм мәҡәләләр
10 Апрель 2023, 12:39

“Атай-әсәйҙәр һәм үҫмерҙәр. Күңел аша һөйләшеү”

Форум ра­йон мәғариф бүлегенең “Йәш блогерҙар мәктәбе. Изгелек быуыны” проектының Мәҙәни башланғыстар Президент фонды үткәргән конкурста еңеп алған грантына ойошторолдо.  

“Атай-әсәйҙәр һәм үҫмерҙәр. Күңел аша һөйләшеү”
“Атай-әсәйҙәр һәм үҫмерҙәр. Күңел аша һөйләшеү”

Күңел яҡынлығын юғалтмайыҡ

Ғафури районында ата-әсәләр һәм үҫмерҙәр ҡатнашлығында ҡыҙыҡлы сара үтте.

Ошо көндәрҙә Красноусол ауылында республикала тәүгеләрҙән булып “Атай-әсәйҙәр һәм үҫмерҙәр. Күңел аша һөйләшеү” тип аталған үҙенсәлекле сара уҙҙы. Ул ра­йон мәғариф бүлегенең “Йәш блогерҙар мәктәбе. Изгелек быуыны” проектының Мәҙәни башланғыстар Президент фонды үткәргән конкурста еңеп алған грантына ойошторолдо.

 

Мөнәсәбәттәр ышанысҡа ҡоролһон

 

Үҙенсәлекле форматтағы сара ата-әсәләргә һәм балаларға үҙ-ара аралашыу, бер-береңде яҡшыраҡ аңлау һәм тыңлау мөмкинлеге бирҙе. Муниципаль кимәлдә тәүге тапҡыр үткәрелгән форум сәләмәт йәшәү рәүешен киңерәк танытыу, ата-әсәләр менән балалар ара­һын­дағы мөнәсәбәттәрҙе нығытыу, үҫмерҙәрҙе социаль әһәмиәтле хеҙмәттәшлеккә йәлеп итеү, йәш­тәрҙең ижади өлкәлә эшләү һәлә­тен үҫтереүҙе маҡсат итеп ҡуйҙы.

Сарала 350 кеше ҡатнашырға теләк белдергән ине. Эш ете йүнә­лештәге дискуссия майҙансыҡта­рында ойошторолдо, уларҙа барлығы 35 спикер сығыш яһаны. Форум программаһында төрлө тематик күргәҙмәләр, педагогтарҙың оҫталыҡ өлгөләре, ҡыҙыҡлы лекциялар, саҡырылған ҡунаҡтарҙың сығыштары, бай йөкмәткеле концерт та ҡаралған ине.

Үҙенсәлекле алымдағы сараны район хакимиәте башлығының социаль мәсьәләләр буйынса урын­баҫары Гүзәл Байдәүләтова алып барҙы. Ҡунаҡтар һәм сығыш яһаған спикерҙар араһында республика Мәғариф һәм фән министрлығының өҫтәмә белем һәм тәрбиә биреү секторы мөдире Лира Хәбибул­лина, Эске эштәр министрлығының полиция участка хеҙмәткәр­ҙәренең һәм бәлиғ булмағандар эштәре буйынса бүлексәнең эшмә­кәрлеген ойоштороу идаралығы начальнигы урынбаҫары Людмила Дерюгина, БР Ата-әсәләр советы рә­йесе Александр Мартынов, “Баш­ҡортостан уҡытыусыһы” журналы­ның баш мөхәррире Салауат Кәри­мов бар ине. Шулай уҡ Ҡалтасы һәм Балтас райондарынан вәкил­дәр, ирекмән­дәр ҡатнашты.

Майҙансыҡтарҙа эш гөрләне

 

Беренсе майҙансыҡ “Хәүеф­һеҙлек” тип аталды. Бындағы һөй­лә­шеү интернет селтәрендә үҙ хәүефһеҙлегеңде тәьмин итеү, ялған мәғлүмәттәр, төрлө шикле ағымдар ауына эләкмәү тураһында барҙы, ата-әсәләргә төрлө файҙалы кәңәштәр бирелде.

Киләһе майҙансыҡ “Беҙ сәләмәт тормош яҡлы” тип аталды. Бында Балалар һәм үҫмерҙәр спорт мәк­тәбе, “Батыр”, “Леон”, “Олимп” клубтары көрәш һәм башҡа спорт йүнә­лештәре буйынса дүрт оҫталыҡ дәресе күрһәтте. Шулай уҡ сәләмәт туҡланыу тураһында ла һүҙ алып барылды, был хаҡта Красноусол үҙәк район дауаханаһы педиатры һәм “Алтын ҡурай”, “Сифат тирмә­не” аутсорсерҙары тарафынан йәнле сығыштар тәҡдим ителде.

“Алдынғы ҡарашлы ата-әсәләр” майҙансығында бала алдындағы яуаплылыҡ, үҙ-үҙеңде үҫтереү, төрлө сетерекле хәлдәрҙә хискә бирелмәйенсә, йәғни һалҡын аҡыл менән ҡарар ҡабул итә белеү тураһында фекер алышыу ойошторолдо. Ата-әсәләр алдында хоҡуҡ һағы хеҙмәткәре Людмила Дерюгина, Башҡортостандың Ата-әсәләр советы рәйесе Александр Мартынов һәм башҡа спикерҙар сығыш яһаны. Баланың һәләтен үҫтереү алымдары тураһында ла төплө фекерҙәр әйтелде. 

“Изгелек эшлә” майҙансығында үҫмерҙәрҙе йәмғиәттәге төрлө социаль мәсьәләләрҙе хәл итеүгә йәлеп итеү, ирекмәнлек хәрәкәтен булдырыу тураһында һүҙ барҙы. Форум ҡунаҡтары – Ҡалтасы ауылының 2-се урта мәктәбе директоры советнигы Э.М. Камалетдинова етәкселегендәге ирекмән­дәр командаһы эш тәжрибәһе менән уртаҡлашты. “Дөйөм эш” Рәсәй йәмғиәт ойошмаһы хаҡын­дағы презентация һәм “Ирекмән-ПРО” конкурсында ҡатнашыу нес­кә­лектәре күптәр өсөн ҡыҙыҡлы булды. Ирекмәндәр Анастасия Шамраева һәм Анастасия Мадьярова үҙҙәре тормошҡа ашырған “Үпкәңде ҡотҡар, үҙеңде үҙгәрт” проекты менән таныштырҙы. Ҡыҙҙар һөлөктәр ярҙамында тәжрибә күрһәтеп, вейптарҙың организмға зарарлы тәьҫирен асыҡ итеп аңлатыуға өлгәште. Был майҙансыҡтың эшендә ҡатнашҡан ата-әсәләр һәм үҫмерҙәр электрон тәмәкенең зыяны тураһында фекер алышыуға әүҙем ҡушылды. Шулай уҡ өҫтәмә белем биреү педагогы Динара Борханова Ғафури районы биләмәһендәге ирекмәндәр хәрә­кәте, ә Ләйсән Табулдина инвалид­тарға ярҙам итеү фонды, сәлә­мәтлеге йәһәтенән үҙенсәлекле балалар менән эшләү тәжрибәһе тураһында һөйләне.

 “Остазлыҡ. Йәштәрҙең финанс мөмкинлектәре” майҙансығы йәш­тәр араһында үткәрелгән төрлө грант конкурстарында ҡатнашыу алымдарына арналды. Бында финанс грамоталылығы, “Рәсәй йәштәре”, “Рәсәй – мөмкинлектәр иле”, “Сәйәхәттән дә күберәк” проекттары тураһында һүҙ барҙы. Ата-әсәләр һәм үҫмерҙәр төрлө социаль проекттарҙың эстәлеге, грант­тарға ғариза биреү, конкурстарҙа ҡатнашыу тәртибе менән яҡындан таныша алды. Фекер алышыуҙы йомғаҡлау барышында ҡатнашыу­сылар уйын формаһында үҙҙәре­нең ижади һәләттәрен күрһәтте.

“Үҙ-ара аңлашыу биләмәһе” майҙансығында милләт-ара дуҫ­лыҡ һәм татыулыҡ, ғаилә традицияларын һәм ҡиммәттәрен һаҡлау һәм нығытыу тураһында һүҙ алып барылды. Бәлиғ булмағандар эштәре буйынса комиссияның өлкән инспекторы Анна Павловна Булатова үҫмерҙәр араһында хоҡуҡ боҙоуҙарҙы иҫкәртеү һәм хоҡуҡи тәрбиә нигеҙҙәре тураһында әңгәмә үткәрҙе. Әлеге майҙансыҡта ҡатнашыусылар М. Аҡмулла исемендәге университет психологтары менән аралашты, төрлө психологик баҫымдарға ҡаршы тороу, ғаиләләге сетерекле хәлдәрҙән сығыу алымдары тураһында белде.

“Арт-квадрат” майҙансығында үҫмерҙәр өсөн төрлө оҫталыҡ дәрестәре ойошторолдо. Ҡом терапияһы, ҡул менән рәсем яһау, кейемгә рәсем төшөрөү, нейрографика кеүек алымдарҙы һынап ҡарау һәр кемгә ҡыҙыҡлы һәм мауыҡтырғыс булды.

 

Форум даими үткәреләсәк

 

Форумдың тантаналы ябыу өлөшөндә уҡыу һәм спорт алдын­ғылары, Бөтә Рәсәй олимпиада­һының муниципаль этабы еңеүсе­ләре, төбәк этабы призерҙары бү­ләкләнде. Шулай уҡ ошо уҡыусы­ларҙың ата-әсәләренә Рәхмәт хаттары тапшырылды.

Форумда ҡатнашыусылар эш һө­ҙөмтәләрен барланы, был сара­ның үҙҙәре өсөн нимә биреүен билдәләне, ҡайһы берәүҙәр психо­логтар менән шәхсән аралаша алды. Ата-әсәләр ҙә, үҫмерҙәр ҙә бындай форматтағы аралашыу­ҙарҙың файҙалы булыуын, ҡайһы бер төшөнсәләргә ҡарата фекере үҙгәреүен әйтте. Сара атай-әсәйҙәргә балаларын яҡшыраҡ аңларға булышлыҡ итте, белгестәр тәрбиә нескәлектәре, ике быуын араһындағы күңел яҡынлығын һаҡлау серҙәре менән уртаҡлашты, тормош тәжрибәһенә таянған кәңәштәрен бирҙе. Балалар үҙҙәре өсөн төрлө оҫталыҡ дәрестәренең, яңы шөғөлдәрҙе һынап ҡарау ҡыҙыҡлы булыуын әйтте.

Сараның ҡунаҡтары һәм спикер­ҙары ла форумдың үҙ маҡсат­тарына өлгәшеүен, юғары кимәлдә ойошторолоуын айырып билдә­ләне. “Мультяша” балалар теле­студияһы 8-9 апрелдә баш ҡала­ның “Торатау” конгресс-холында үтәсәк Республика ата-әсәләре форумында ҡатнашырға саҡырыу алды. Шулай уҡ ҡайһы бер дискуссия майҙан­сыҡтарындағы йүнәлештәр ҙә ошо сарала сағылыш табасаҡ.

Ғафури районы хакимиәте етәкселеге файҙалы форумды даими үткәреү ниәте тураһында бел­дерҙе. Был фекерҙе сарала ҡатна­шыусыларҙың барыһы ла хупланы.

- Гөлдәр ЯҠШЫҒОЛОВА (“Башҡортостан”)

 

“Атай-әсәйҙәр һәм үҫмерҙәр. Күңел аша һөйләшеү”
“Атай-әсәйҙәр һәм үҫмерҙәр. Күңел аша һөйләшеү”
“Атай-әсәйҙәр һәм үҫмерҙәр. Күңел аша һөйләшеү”
“Атай-әсәйҙәр һәм үҫмерҙәр. Күңел аша һөйләшеү”
“Атай-әсәйҙәр һәм үҫмерҙәр. Күңел аша һөйләшеү”
“Атай-әсәйҙәр һәм үҫмерҙәр. Күңел аша һөйләшеү”
“Атай-әсәйҙәр һәм үҫмерҙәр. Күңел аша һөйләшеү”
“Атай-әсәйҙәр һәм үҫмерҙәр. Күңел аша һөйләшеү”
“Атай-әсәйҙәр һәм үҫмерҙәр. Күңел аша һөйләшеү”
Автор:ЗӨБӘРЖӘТ ЯҠУПОВА
Читайте нас: