Сәхнәлә - йәш актерҙар

Мәжит Ғафуриҙың: «Бер көн шулай гөлдәр баҡсаһында сәскәләрҙе ҡылдым тамаша», тигән шиғырындағы кеүек, сәхнәлә сығыш яһаған балалар таланттары менән таң ҡалдырҙы. Конкурста райондың төрлө төбәктәренән бөтәһе 11 коллектив ҡатнашты. Уларҙы район мәғариф бүлегенең әйҙәүсе белгесе Гөлнара Билалова, үҙәк район китапханаһы хеҙмәткәре Гөлнара Нурғәлиева, балалар ижады йорто педагогы Гөлфирә Хәкимова, Әбйәлил мәғлүмәт үҙәгенең «Осҡон» гәзите хәбәрсеһе Гөлфиә Ниғмәтуллина баһаланы.

Тәүгеләрҙән булып беҙҙе Асҡар мәктәбенең «Төп ролдәр» театр коллективы сәләмләне. Беҙ улар башҡарыуында Валентин Распутиндың «Матёра менән хушлашыу» әҫәренән өҙөк ҡараныҡ. Таһир Кусимов исемендәге гимназияның «Мираҫ» театр коллективы Фәрзәнә Аҡбулатованың «Дуҫтар ниндәй була?» әкиәтен сәхнәләштерҙе. Декорацияға бай, күҙҙең яуын алырҙай сағыу костюмдары менән сәхнәгә сыҡҡан, тик башҡорт телендә генә тытылдап торған бәләкәстәрҙең сығышын залдағылар яратып ҡараны. Бигерәк тә Болот (Гөлназ Саниева) һәм Еләк (Самира Мөхәмәтдинова) ролдәрен башҡарған ҡыҙҙарҙың сығыштары оҡшаны.

Йыраҡ араны яҡын итеп килгән Аһылай мәктәбе уҡыусылары («Ынйылар» театр коллективы) Фәрзәнә Аҡбулатованың «Атай икмәге» әҫәренән өҙөк тәҡдим итте. Өҙөктө уңышлы һайлаһалар ҙа, сәхнәлә уҡыусыларҙың етдилеге күренмәне. «Ижад» театр коллективы башҡарыуында (Ишҡол) Әнисә Фәррәхованың «Яҡшы бүләк» әҫәренән өҙөк ҡараныҡ. Бында уҡыусыларҙың саф башҡортса таҙа һәм тасуири һөйләүҙәре оҡшаны.

Ә бына Һамар мәктәбенең «Буратино» коллективы ҡуйған «Иҫке фото» сценкаһын ҡарағанда күҙҙәргә йәштәр төйөлдө. Бөйөк Ватан һуғышы мәлендә улдарын да, ейәндәрен дә юғалтҡан өләсәйҙең бары тик фотоларға ҡарап, балаҡайҙары тураһында һөйләүе ҡыҙғаныс күренеш булды. Бында костюмдар һәм артҡы фон еренә еткереп эшләнеп етелмәгәне генә күҙгә ташланды.

«Знайка» театр коллективының (Сиҙәм) Борис Заходерҙың «Аждаһаға ярҙам итегеҙ» әкиәтенән күренешен тамаша ҡылғанда костюмдарҙың үҙенсәлекле булыуын һыҙыҡ өҫтөнә алдыҡ. Әкиәттә ҡатнашҡан уҡыусылар тере йәнлектәрҙе хәтерләтте. Ташбулат мәктәбенең «Дуҫлыҡ» театр коллективы башҡарған «Әҙәпле ҡуян» әкиәтен ҡарағанда уҡыусыларҙың артыҡ ҡабаланып һөйләүҙәре ҙур етешһеҙлек булды.

«Браво» театр коллективы (Атауҙы) Фәнил Әсәновтың «Яралы ыласын» әҫәренән өҙөк сәхнәләштерҙе. Бында иһә сәхнә геройҙары тамашасыларға әҫәрҙең асылын алып барып еткермәне, уҡыусылар үҙҙәрен сәхнәлә актер булараҡ асып етмәне. Озерный мәктәбенең «Озерное» театр коллективы «Ҡыҙҙар һуғышҡа китте» сценкаһын тәҡдим итте. Декорация бай, образдар сағыу булһа ла, уҡыусыларҙың телмәрендә тасуири һөйләү, сығыштарында хис-тойғолар сағылманы.

«Аманат» театр коллективы (Амангилде) ҡуйған Мостай Кәримдең «Үлмәҫбай» поэмаһынан өҙөк тамашасыларҙың күңеленә хуш килде. Бигерәк тә төп ролде башҡарған Зиннур Мәғәфүровтың сығышын яратып ҡараныҡ.

Красная Башкирия мәктәбенең «Нур» фольклор коллективы «Өләсәйҙең серле һандығы» күренешен сәхнәләштерҙе. Серле һандыҡта милли биҙәүестәрҙе, һаҡал-ҡашмауҙарҙы һаҡлаған өләсәй йәш быуынға уларҙың кәрәклеге һәм асылы тураһында бәйән итте.

Оҙаҡ фекер алышҡандан һуң, жюри ағзалары бер һүҙҙән булып Гран-прины Таһир Кусимов исемендәге «Мираҫ» театр коллективына бирергә ҡарар итте. Беренсе урынды сиҙәмдәр алһа, икенсе урынды Һамар һәм Озерный мәктәбе уҡыусылары бүлеште. Өсөнсө урынды Ишҡол, Атауҙы һәм Амангилде мәктәптәре яуланы. Асҡар мәктәбе «Драмалы театр», Аһылай һәм Красная Башкирия «Үҙенсәлекле постановка» номинацияһында еңеүселәр булды. Ташбулат мәктәбе уҡыусылары «Өмөт» номинацияһында билдәләнде.

Шәхси геройҙар араһында ла номинацияларҙы ла билдәләү еңелдән булманы, сөнки һәр театр коллективында үҙенә ғашиҡ иткән, тамашасы күңелен арбаған бер герой бар ине. Шулай итеп, «Иң яҡшы ҡатын-ҡыҙ ролен башҡарыусы» номинацияһына Еләк ролен башҡарыусы Самира Мөхәмәтдинова (гимназия) лайыҡ булды. Ә үҫмерҙәр араһында «Иң яҡшы ир-егет ролен башҡарыусы» тип Үлмәҫбай ролен оҫта уйнаған Зиннур Мәғәфүров (Амангилде) табылды. «Иң үҙенсәлекле костюм» номинацияһында еңеүсе тип Сиҙәм мәктәбенән Роман Комаров (Аждаһа) билдәләнде.

Конкурсҡа театр коллективтарын әҙерләүсе етәкселәрҙең етдилеген һәм төптән уйлап, тәрән фекер йөрөтөүҙәрен билдәләп китеү зарур. Күп театр коллективтарының сығышында илебеҙҙе борсоған хәл-ваҡиғалар ҡыҙыл еп булып үтте. Бөйөк Ватан, Афғанстан, Чечня һуғыштары ваҡытындағы хәл-ваҡиғаларҙы, хәҙер килеп Украинала барған сыуалыштарҙы һүрәтләгән сығыштар бер кемде лә битараф ҡалдырманы. Беренсенән, конкурс йәш быуында патриотик тәрбиә һалыуға нигеҙ булһа, икенсенән, уҡыусыларҙың ижади һәләттәрен асыуға йүнәлтелгән. Балалар араһында йәш таланттарҙы асыҡлау, уларҙы сәхнәгә сығарыу йәһәтенән әйтеп бөткөһөҙ роль уйнаған конкурста быға тиклем ҡайҙалыр үҙен һынап ҡарағандары ла, беренсе тапҡыр сәхнәгә сыҡҡандары ла булғандыр. Әммә улар һынатманы, барыһы ла балаларға хас бер ҡатлылыҡ менән ихлас уйнаны, сәхнәлә үҙҙәрен ысын актер итеп тота белде.

Был көндө сәхнә йәйғор нурындай балҡып торҙо. Әлбиттә, был сараға балаларҙы әҙерләп килтергән етәкселәренең хеҙмәте баһалап бөткөһөҙ. Сарала балалар сығыш яһап ҡына ҡалманы, бер-береһенең сығышын ҡарап, үҙҙәренә илһам алды. Һис шикһеҙ, тағы ла ҡатнашырға тигән теләк уларҙың күҙҙәрендә балҡып тора ине.

Г. ТИМЕРЙӘНОВА.