-2 °С
Ҡар
Бөтә яңылыҡтар
Ижад ҡомары
15 Февраль 2024, 14:25
Ижад ҡомары
Ишектәрҙе асыусыЭссе Ҡытай халыҡ мәҡәлендә: «Уҡытыусы тормош ишектәрен генә аса, әммә унда уҡыусы үҙе инергә тейеш», – тиелә. Был аҡыллы һүҙҙәрҙең тәрән мәғәнәһе мине хайран ҡалдырҙы. Уҡытыусылар иңендә шундай ҙур яуаплылыҡ ята! Һәр уҡыусыға тормошта дөрөҫ ишекте асырға, ә иң тәүҙә уға тура килгән асҡыстарҙы һайларға кәрәк. Һәм миңә тап шундай уҡытыусылар осраны. Дәрестәрем күбеһенсә дистанциялы формала үтә, әммә шуға ҡарамаҫтан, улар бик ҡыҙыҡлы була. Һәр педагог миңә фән донъяһына белем ишеген асырға ярҙам итә. Уҡытыусылар минең өсөн бигерәк тә мауыҡтырғыс квестар, марафондар, интерактив эштәр, видеороликтар һәм презентациялар уйлап таба. Бергәләп проекттар әҙерләйбеҙ, төрлө ғилми конференцияларҙа тикшереү эштәр менән ҡатнашабыҙ.Беҙҙә, Республиканың инвалид балаларға дистанцион белем биреү үҙәгендә, шундай оҫта һәм тәжрибәле уҡытыусылар эшләй. Һәм бигерәк тә урыҫ теле һәм әҙәбиәте уҡытыусыһы Ирина Юрьевна һәм математика уҡытыусыһы Светлана Викторовналарҙы айырып әйтеп үтер инем. Улар һәр дәресте нурлы йылмайыуҙан башлай. Минең шунда уҡ күңелем күтәрелә. Аралашыу ҙур байрамға әүерелә. Әҫәрҙәрҙән сәнғәт донъяһына үтеп инәбеҙ, серҙәренә төшөнәбеҙ һәм бөйөк урыҫ теленең серҙәрен асабыҙ. Ә математика дәрестәрендә Светлана Викторовна ауыр мәсьәләләрҙе еңел генә итеп сисергә, кәсер һандар менән миҫалдарҙы ла дөрөҫ эшләргә өйрәтте. Минең өйгә килеп уҡытҡан уҡытыусыларым, һис шикһеҙ, дөрөҫ ишектәрҙе асырға өйрәтә, шуға ла мин ышаныслы аҙымдар менән белем илендә атлайым, алға барам.Уҡытыусыларым бер-береһенә бик тә оҡшаған. Улар яратҡан эшенә бар булмышы менән хеҙмәт итә. Остаздарымдың барыһы ла минең өсөн бик ҡәҙерле. Һәм уларҙың һәр береһен тормош тигән ҙур донъяға ишек асырға ярҙам итеүесе уҡытыусы тип әйтер инем. Злата Дадонова,Республиканың инвалид балаларға дистанцион белем биреү үҙәгенең Стәрлетамаҡ бүлексәһе уҡыусыһы.
Ижад ҡомары
Шифалы ҡайын
Борон заманда Ғариф исемле егет йәшәгән. Уның һылыу ғына ҡатыны һәм өс балаһы булған. Ғариф балаларына бик яҡшы атай, тырыш ир булған, ауылдаштары ла уны шул уңғанлығы өсөн хөрмәт иткән.
Бер көндө Ғариф урманға бәшмәк йыйырға китә, тик кире ҡайтырға юлды таба алмай аҙаша.
Шул саҡ бер бүре килеп сыға һәм Ғарифҡа ташлана, егет уның менән оҙаҡ алыша, ныҡ яралана, әммә бүрене үлтерә.
Шунан шыуышып булһа ла урмандан сығырға тырыша, әммә хәлдән тайып, бер йәш ҡайын төбөнә йығыла. Ҡанға туҙып ятҡан егетте ҡайын бик йәлләй. Моғайын, уны өйөндә ҡатыны, балалары көтәлер, үҙе лә бик яҡшы кешегә оҡшаған, тип уйлай. Ҡайындың шифалы күҙ йәштәре егеттең яраһына тама, яралары төҙәлә башлай, егет аңына килә.
Үҙенең ҡотҡарыусыһына рәхмәттәр әйтеп, Ғариф ҡайтып китә. Ҡайтҡас та ул ҡайындың шифаһы тураһында ауылдаштарына һөйләй. Шул хәлдән һуң кешеләр йыл һайын ауыл янында ҡайын ағасы ултырта башлай. Шулай итеп ҙур ҡайынлыҡ барлыҡҡа килә.
Айнур Ишмырҙин,
Ғафури районы Красноусол ауылының
2- се мәктәбе уҡыусыһы.
Уландар
Ваҡытһыҙ китә йәш улдар,
Тыныс ятһын тиеп тыуған ерҙәр.
Йәшәп туймағанбыҙ тиеп тормай,
Көсөн һалып, тыуған ерен һаҡлай.
Илай торғас, оло инәйҙәрҙең,
Кибеп бөттө күҙ йәштәре.
Ҡосағыңа алып ҡосһаңсы, Хоҙай,
Туҡтар, бәлки, күҙ йәштәре...
Төн йоҡоларын йоҡламай,
Аяҡ өҫтө улар торалар.
Илем, күгем тыныс булһын тиеп,
Бар көстәрен улар түгәләр.
Гүзәлиә Хәмитова,
Бөрйән районының Байназар мәктәбҽ уҡыусыһы.
Атайыма
Атайым китте һуғышҡа
Һаҡларға Рәсәй илен.
Яҡындарын, уландарын,
Һәм яҡлап тыуған ерен.
Беҙ атайҙың өс уланы
Ҡалдыҡ оҙатып уны.
Атайҙы бик һағынабыҙ,
Күҙ алдыбыҙҙа һыны.
Был һуғыш ҡасан бөтөр?
Ҡасан кибер күҙ йәше?
Атайыбыҙ тиҙерәк ҡайтһын,
Миҙалға тулып түше.
Тынысланһын илем күге,
Алһыуланып атһын таң.
Еңеүсе атайҙарға
Беҙ теләйбеҙ шөһрәт-дан.
Тимур Мырҙабулатов,
Баймаҡ районының Ҡаратал мәктәбе уҡыусыһы.
Ҡайтһын егеттәр!
Тиҙҙән генә яҙ килер,
Ауылға ҡоштар ҡайтыр.
Йылы яҡтан ҡайтҡан ҡоштай,
Яуҙан егеттәр ҡайтыр.
Бер яраһыҙ һуғыштан
Ҡайтһын инде ир-егеттәр.
"Һаумы, балам!" — тип ҡосаҡлап,
Ҡыуанышһын әсәләр...
Гүзәлиә Хәмитова,
Бөрйән районының Байназар мәктәбҽ уҡыусыһы.
Һуғыш булмаһын
Олатайҙар тыныслыҡ өсөн,
Һуғышта башын һалған.
Балаларым тыныс йәшәһен, тип,
Фашист ғәскәренә ҡаршы барған.
Рәхмәтлемен бөгөнгө яугирға,
Ҡурҡыу белмәҫ башҡорт егетенә.
Һау-сәләмәт әйләнеп ҡайтһын
Ғәзиз тыуған еренә.
Илүзә Айытбаева,
Бөрйән районының Байназар мәктәбе уҡыусыһы, “Аманат”тың йәш хәбәрсеһе.
Тыныслыҡ
(акрошиғыр)
Таңдар ата, һыҙылып,
Ысыҡ емелдәй гөлдә.
Нарасайы – ут эсендә.
Ышаныс, теләк әсәлә.
Сафландырып Ғаләмде
Ләйсән ямғыры ҡойһон!
Ырыҫ–бәхет килһен Ергә,
Ҡан ҡойоштар туҡтаһын!
Карина Мәҡсүтова,
Ғафури районының Игенйылға мәктәбе уҡыусыһы
Онотмаһын ине илем!
(Атайыма)
1984-тән 1987-гәсә
Афған һуғышында булғанһын.
Амударъя йылғаһына төшөп,
Әсе тирҙәреңде йыуғанһың.
Бөгөнгөләй күңел түреңдә
Яуҙа ҡалған һәр бер иптәшең.
Һеҙҙең ҡылған батырлыҡты илем,
Онотмаһын ине, иҫләһен!!!
Вәсилә Әйүпова,
Бөрйән районының Байназар мәктәбе уҡыусыһы, “Аманат”тың
йәш хәбәрсеһе.
Фото: асыҡ интернет селтәренән алынды.
Ижад ҡомары
Новости партнеров