“Аманат”тың сираттағы һаны донъя күрҙе.

Беҙ һеҙгә Әнисә Зарипованың “Байрам бүләге”, “Һырға бәләһе” һәм Минира Бикәнәсованың “Аҙаштырған туңдырма”, “Әсәйҙәрегеҙҙе ял иттерегеҙ!” исемле хикәйәләрен тәҡдим итәбеҙ.

 “Башҡорт ырыуҙары” рубрикаһы был юлы Балыҡсы ырыуы – Башҡортостандың төньяғын төйәкләгән башҡорт ырыуына арналды. Хәҙерге көндә Балыҡсы ырыуы ерҙәре Башҡортостандың Асҡын, Ҡариҙел райондарына һәм  Татарстандың Апас райондарына ҡарай. Кем дә кем шул тарафтарҙан, үҙегеҙҙең ырыу-тамғағыҙ тураһында уҡырға онотмағыҙ, йәме?

“Минең шәжәрәм” конкурсына Баймаҡ районының Үрге Таулыҡай мәктәбе уҡыусыһы Наҙгөл Баййегетова йөкмәткеле хат яҙып ебәрҙе. Таулыҡай ауылы тарихы  менән журналыбыҙҙың 19-сы битендә танышырһығыҙ.

Журнал постерын биҙәгән егеттәр кем ул, тип һорарһығыҙ. Улар Йылайыр балалар сәнғәт мәктәбенең “Аҡбейек” ҡурайсылар ансамбле.

Ҡул эштәре менән шөғөлләнергә яратыусы һәм шул уҡ ваҡытта блогер, вайнер  - Рәлиә Йәһүҙинә менән Зарина Бағышаева әңгәмәһен 4-се биттә уҡырһығыҙ.

“Мәңгелек сер”гә Асия исемле һылыу,  һыу инергә генә барып ғашиҡ булғаны тураһында яҙып ебәрҙе. Һеҙҙә үҙегеҙҙең мөхәббәт тарихын беҙгә яҙып ебәрергә онотмағыҙ, яраймы?

Нимә ул “Pop-it” йәки “Simple Dimple”? Был тупайсыҡтар хаҡында Сәлимә Ҡаранаева әҙерләгән  мәҡәләне уҡып белерһегеҙ.

Журналға күҙәтеүҙең иң аҙағына иң ҡыҙыу конкурстарыбыҙҙың береһе – “Ай, һылыу!”ҙы ҡалдырҙыҡ. Кем еңеүсе булған икән? Сер һандығын бер аҙ аса биреп ҡуябыҙ – был матурҡай Асҡын районы ҡыҙы ул!

Йә, артығын “һайрамаҫ” элек, күҙәтеүҙе ошо урында туҡтатып торайыҡ.