Балалар футбол секцияһына яҙылырға теләй

Һуңғы бер ай эсендә футбол секцияларына яҙылырға теләгән балалар һаны ике тапҡырға артҡан, тип яҙа “Башинформ” агентлығы. Быны аналитиктар футбол буйынса донъя чемпионаты менән бәйләй.

“Футбол буйынса донъя чемпионаты плей-офф стадияһына – турнирҙың иң көсөргәнешле һәм тамашалы өлөшөнә сыҡты.

Уйындарҙы миллиондарса көйәрмәндәр күҙәтә, өлкәндәр менән бергә экрандар алдында балалар һаны арта бара: күптәр өсөн был турнир футбол менән беренсе ҙур танышыу булды.

Уйын менән илһамланып, балалар ата-әсәләренән секцияға яҙҙырыуҙы һорай башлаған.

Аналитиктар республикала футбол менән шөғөлләнеүгә ихтыяжды анализланы һәм 2026 йылдың июнендә 2025 йылдың ошо осоро менән сағыштырғанда уның ике тапҡырға артыуын асыҡланы”, – тигәндәр  “Авито-Поволжье”ла.

Шулай итеп, бер йыл эсендә футболға яҙылырға теләүселәр һаны ике тапҡырға артҡан.

Хаҡтар юғары:

футбол тренеры менән шәхси күнегеү хаҡы – уртаса 2,5 мең һум,

ҙур футбол майҙанын арендалау – сәғәтенә 5–10 мең һум,

мини-футбол майҙансығы  – сәғәтенә 2 мең һум тирәһе.

Ҙур сығымдарға ҡарамаҫтан, өлкәндәрҙә лә, балаларҙа ла футболға ҡыҙыҡһыныу арта ғына бара.

Фото: Олег Яровиков / Башинформ / архив.

***

“Аманат” – MAКС-та  max.ru/amanatrb