Стәрлетамаҡтан Полина Дмитриева юниорҙар Европа чемпионатында 5 миҙал яуланы

Спорт гимнастикаһы буйынса юниорҙарҙың Европа чемпионаты Хорватияның Загреб ҡалаһында үтте.  Шәхси күпбәйгелә 14 йәшлек Полина 53,165 балл менән  көмөш миҙал яуланы. Рәсәйҙән Александра Андрианова алтын миҙаллы булды, ә бронза награданы Италиянан Кларисса Ринальди алды.

Айырым төрҙәр буйынса ярыштарҙа Полина үҙе ҡатнашҡан өс дисциплинала еңеүсе булды: төрлө кимәлле брустарҙа – 13,900 балл, бүрәнәлә – 13,993, ирекле программала 13,233 балл йыйҙы.

Шулай уҡ Рәсәй йыйылма командаһы составында Полина Дмитриева команда күпбәйгеһендә Европа чемпионкаһы булды, Рәсәй командаһы 158,629 балл йыйҙы. Икенсе урында – Италия, өсөнсө – Франция командалары.

Башҡортостан Башлығы Радий Хәбиров социаль селтәрҙәрҙә йәш спортсыны һәм уның тренеры Елена Кайгулованы ҡотланы:

“Һуңғы ике көн эсендә Стәрлетамаҡтан йәш йондоҙсоҡ почет пьедесталына биш тапҡыр күтәрелде.

Беҙҙең Полина Дмитриева спорт гимнастикаһы буйынса Хорватиялағы юниорҙар Европа чемпионатнда  4 алтын һәм 1 көмөш миҙал яуланы. Уны һәм уның остазы, Башҡортостан йыйылма командаһының өлкән тренеры һәм Рәсәй йыйылма командаһы тренеры Елена Кайгулованы ҡотлайым.

Был ярыштан Олимпиадаға тиклем – ике аҙым. Ул 2028 йылғы Олимпия уйындарына беренсе квоталар уйнатыласаҡ донъя чемпионатына һайлап алыу турниры булып тора. Ҡыҫҡаһы, беҙ Полинаның көйәрмәндәре! Уңыштар!”

Фото: Радий Хәбиров /МАКС 

 “Аманат” – MAКС-та  max.ru/amanatrb