Деструктив хәрәкәттәр менән ҡыҙыҡһынған 34 үҫмер асыҡланған

Быйылғы  дүрт ай эсендә 34 баланың тыйылған хәрәкәттәр эшмәкәрлегенә ҡағылышы булыуы асыҡланған. Атап әйткәндә, күбеһе скулшутинг таратыусы “Колумбайн”* хәрәкәтенә ылыҡҡан. Был турала Рәсәй Эске эштәр министрлығының Башҡортостан буйынса Экстремизмға ҡаршы тороу үҙәге хәбәр итә.

Быйылғы дүрт айҙа ошо тарафта эш иткән 38 кеше тотолһа, шуның 34-е – бәлиғ булмағандар.

“Асыҡланған үҫмерҙәрҙең күпселеге – Өфө һәм Стәрлетамаҡ мәктәптәре уҡыусылары. Улар араһында ун өс йәшлектәр – 9, ун дүрт йәшлектәр – 7, ун биш йәшлектәр – 8. Социаль селтәрҙәрҙе тикшереү һәм күҙәтеү барышында асыҡланыуынса, улар интернетҡа йә мессенджерҙарға һалған контент ошо тематика менән бәйле. Әлеге үҫмерҙәрҙең туранан-тура енәйәт ҡылыу ниәте юҡ, шуға ҡарамаҫтан, беҙ яуапһыҙ ҡала алманыҡ. Тикшереүҙәр һөҙөмтәһендә рәсми иҫкәртеүҙәр сығарылды, 9 үҫмер психолог-психиатр тикшереүе үтергә ебәрелде, ата-әсәләргә административ протоколдар төҙөлдө”, – тип һөйләгән БР Дәүләт Йыйылышы-Ҡоролтайҙа үткән кәңәшмәлә Экстремизмға ҡаршы тороу үҙәге начальнигы Тимур Назыров.

Үҙәк хоҡуҡҡа ҡаршы контентты бикләү, үҫмерҙәрҙе һәр төрлө енәйәттәргә, диверсияларға ылыҡтырыу менән шөғөлләнгән кешеләрҙе асыҡлау  буйынса Роскомнадзор менән хеҙмәттәшлек итә.

* “Колумбайн” хәрәкәте террористик ойошма тип танылған һәм Рәсәй Федерацияһы территорияһында тыйылған.

Сығанаҡ: Башинформ.