Башҡортостанда этнографик диктант уҙасаҡ

3 ноябрҙә Башҡортостанда Халыҡтар берҙәмлеге көнөнә ҡарата «Ҙур этнографик диктант» акцияһы уҙа. Республикала был акция икенсе тапҡыр үтә.

Этнография буйынса диктант яҙыу өсөн 12 майҙансыҡ билдәләнгән. Улар иҫәбендә — Башҡорт дәүләт университеты, атап әйткәндә, Тарих һәм дәүләт идара итеүе институты (К. Маркс урамы, 3/4, гуманитар корпус, 4-се ҡат, 405-се аудитория), шулай уҡ юғары уҡыу йортоноң Сибай, Нефтекама, Бөрө, Стәрлетамаҡ ҡалаларындағы филиалдары; М. Аҡмулла исемендәге Башҡорт дәүләт педагогия университеты; Мәләүездәге Башҡортостан технологиялар һәм идара итеү институты; Башҡортостан социаль технологиялар институты; Өфө киң профилле һөнәри колледжы; Стәрлетамаҡ киң профилле һөнәри колледжы; Нефтекама педагогия колледжы; Мәсәғүт педагогия колледжы.

Диктант 30 тест һорауынан тора, ул федераль (20 һорау) һәм төбәк (10 һорау) тематикаһын үҙ эсенә ала. Тесҡа 45 минутта яуап бирергә кәрәк. Онлайн-тесты 3 ноябрҙә иртәнге сәғәт 10-дан 5 ноябргә тиклем үтергә мөмкин.

Диктанттың һөҙөмтәләрен, эштәрҙең дөрөҫ яуаптарын һәм типик хаталарҙы 12 декабрҙә сайтта ҡарарға була.

Проект тураһында тулыраҡ мәғлүмәттәр менән танышыу өсөн www.miretno.ru буйынса үтегеҙ.