+13 °С
Облачно
Яңылыҡтар
14 Сентября 2022, 04:30
Башҡортостан – Рәсәйҙең мәктәп туризмы программаһы башланған пилот төбәктәренең береһе
Радий Хәбиров республикала мәктәп туризмын үҫтереү программаһының тормошҡа ашырылыуы хаҡында һөйләне.
Башҡортостан – Рәсәйҙең мәктәп туризмы программаһы башланған пилот төбәктәренең береһе
Башҡортостан – Рәсәйҙең мәктәп туризмы программаһы башланған пилот төбәктәренең береһе. Республика етәксеһе Радий Хәбиров үҙенең телеграм-каналында уны тормошҡа ашырыу, уҡыусыларҙың тәүге сәфәрҙәре хаҡында яҙып сыҡты.
«Тәүге сәфәрҙәр ойошторолдо, тәьҫораттар яҡшы. Нуриман, Благовещен, Миәкә, Салауат – балаларҙың бер өлөшө был райондарҙы беренсегә күрҙе. Улар ир-егеттәр монастырына, Павловка һыуһаҡлағысына, Ҡыҙыл Шишмәгә һәм башҡа күркәм урындарға барҙы», – тип яҙҙы Радий Хәбиров.
Уҡыусыларҙың сәйәхәтен ойоштороу өсөн «Туризм һәм ҡунаҡсыллыҡ индустрияһы» милли проекты буйынса Башҡортостанға федераль бюджеттан 55,5 миллион һум бүленде, тип билдәләне республика Башлығы. Ә республика ҡаҙнаһынан 22,2 миллион һум йүнәлтелде. Артабан ул балалар өсөн сәфәрҙе нисек ойошторорға кәрәклеген дә иҫкә төшөрҙө.
«Ғаризаны мәктәп һәм район мәғариф бүлеге әҙерләй. Ҡатнашыусылар –5-се, 9-сы класс уҡыусылары. Көндө, ваҡытты һәм маршрутты һайларға мөмкин. Сәфәрҙәр яҡшы ойошторолған, улар ике көнлөк, уҡыусылар өсөн бушлай. Беҙ берҙәм федераль реестрға ингән республика туроператорҙарын йәлеп иттек», – тип билдәләне республика етәксеһе.
Сәйәхәттәр буйынса өҫтәмә мәғлүмәтте эш көндәрендә (347) 218-17-20 телефоны буйынса Башҡортостан Республикаһы Эшҡыуарлыҡ һәм туризм министрлығының туризм программаларын тормошҡа ашырыу бүлегендә алырға мөмкин.
