Китап уҡырға яратаһығыҙмы?

Конкурста ҡатнашыр өсөн ғаиләгеҙҙәге өлкәндәр менән бергәләп ҡысҡырып китап уҡыу ойоштороғоҙ. Положениела яҙылыуынса, рус телендә уҡырға кәрәк. Берәмләп уҡыйһығыҙмы, алмашлапмы, бөтәгеҙ бергәме – был мәлде матур ғына итеп видеоға төшөрөгөҙ. Оҙайлығы 1 - 3 минут булһын.  Шунан видеояҙманы тейешле урынға ебәрегеҙ. Шарттарҙы яҡшыраҡ өйрәнер өсөн конкурстың Положениеһын табып уҡығыҙ. Башинформ сайтында конкурс тураһындағы мәҡәләлә Положение бар.

Конкурс номинациялары икәү:

*Проза

*Шиғриәт

Эштәрҙе 2024 йылдың 30 сентябренә тиклем ҡабул итәләр.

Һәр номинацияла өсәр ғаилә еңеүсе тип билдәләнәсәк.

Еңеүселәргә дипломдар, китаптар бүләк итеү, мәҙәни программа ҡаралған.

Бүләкләү тамашаһы Мәскәүҙә декабрь айында буласаҡ.

***

"Тотош ғаилә менән уҡыйбыҙ" конкурсы Рәсәй Президенты В. Путин иғлан иткән "Ғаилә йылы" сиктәрендә үткәрелә. Маҡсаты – ғаиләлә бергәләшеп китап уҡыу йолаһын яңыртыу һәм таратыу, ғаиләлә китап уҡыу даирәһен киңәйтеү, балаларҙың ата-әсәләре, олатай-өләсәйҙәре менән нығыраҡ аралашыуына шарттар тыуҙырыу, ғаиләне нығытыуға һәм балаларҙа рухи-әхләҡи ҡиммәттәрҙе үҫтереүгә булышлыҡ итеү.

Сығанаҡ: Башинформ.

0+