Ағымдағы йылда Башҡортостанда 31 мәктәп капиталь ремонтланасаҡ

Башҡортостан Башлығы белдереүенсә,  быйыл республикала 31 мәктәпте ремонтлау күҙ уңында тотола, уларҙың алтауһында (Өфө, Күмертау, Стәрлетамаҡ, Бишбүләк, Әбйәлил, Баймаҡ райондарында) мәктәптәр ағымдағы йылда уҡ яңырасаҡ, ә ҡалған 25 учреждениела ремонт ике йыл дауам итәсәк. 2025 йылда тағы ла 8 мәктәп ремонтланасаҡ.

“Ошо маҡсатта 2024-2025 йылдарҙа федераль бюджеттан 3,335 млрд һум аҡса йәлеп итәсәкбеҙ. Был беҙҙең мәғариф системаһына ныҡлы ярҙам буласаҡ”, - тип билдәләне Радий Фәрит улы.

Федераль программа буйынса 2022 һәм 2023 йылдарҙа Башҡортостанда 140 мәктәптә ремонт башҡарылған.

Был программа сиктәрендә ике йыл эсендә республикала 140 мәктәп бинаһы модернизацияланған, ә 2026 йылдың аҙағына тиклем төбәктә бөтәһе 214 уҡыу йорто яңыртыласаҡ.

Бынан тыш, Башҡортостандың Мәғариф һәм фән министрлығы 2025 – 2027 йылдарға тағы 360 мәктәп бинаһын капиталь ремонтлауға өҫтәмә ғариза ебәргән.

Хәтерегеҙгә төшөрәбеҙ: уҙған йыл йомғаҡтары буйынса Башҡортостан төҙөлгән һәм ремонтланған мәктәптәр һәм балалар баҡсалары һаны буйынса илдә алдынғы төбәктәр иҫәбенә инде.

Фото: асыҡ интернет селтәренән алынды