Өфөлә Рәсәйҙең төбәктәренән балалар өсөн этномәғариф сменаһы үткәрелә

Башҡортостан Республикаһының Мәғариф һәм фән министрлығы Рәсәй өлкәләрендә башҡорт телен һаҡлау һәм үҫтереү маҡсатында 2024 йылдың 29-31 октябрендә Башҡортостан Республикаһының Рәми Ғарипов исемендәге 1-се башҡорт гимназия-интернатында Башҡорт теле һәм әҙәбиәте буйынса Рәсәй Федерацияһы төбәктәренең һәм БДБ илдәренең белем биреү ойошмалары педагогтары өсөн туған (башҡорт) телен өйрәнеү буйынса семинар-кәңәшмә һәм Рәсәй Федерацияһы төбәктәренән балалар өсөн этномәғариф сменаһын үткәрә.

Саралар Башҡортостан Республикаһы Хөкүмәтенең 2024 йылдың 29 ғинуарындағы 17-се ҡарары менән раҫланған "Башҡортостан Республикаһының дәүләт телдәрен һәм Башҡортостан Республикаһы халыҡтары телдәрен һаҡлау һәм үҫтереү" дәүләт программаһын тормошҡа ашырыу сиктәрендә үткәрелә.

Сараларҙа башҡорт теле һәм әҙәбиәте уҡытыусылары, өҫтәмә һәм мәктәпкәсә белем биреү ойошмалары педагогтары һәм Силәбе, Ырымбур, Һамар, Ҡурған, Свердловск өлкәләре һәм Пермь крайынан, Татарстан Республикаһынан, ХМАО-Югранан, шулай уҡ Ҡаҙағстан Республикаһынан уҡыусылар ҡатнаша.

Семинар башҡорт теле һәм әҙәбиәте уҡытыусыларының квалификацияһын күтәреү, педагогик тәжрибәне тикшереү һәм дөйөмләштереү маҡсатында үткәрелә. Семинар сиктәрендә белем биреү тректары ҡаралған, унда уҡытыуҙы һәм өйрәнеүҙе һөҙөмтәле ойоштороу мәсьәләләре, эш программалары, оҫталыҡ дәрестәре, педагогик оҫтаханалар ҡараласаҡ, юғары белем биреү ойошмаларына барыу планлаштырылған.

Этномәғариф сменаһы Рәсәй Федерацияһы субъекттарының дөйөм белем биреү ойошмалары уҡыусыларының туған (башҡорт) телен өйрәнеп, Өфө ҡалаһының тарихи-мәҙәни иҫтәлекле урындарына барыуын, билдәле шәхестәр менән ҡыҙыҡлы осрашыуҙар үткәреүен күҙ уңында тота.

Сарала ҡатнашыусылар өсөн "Өс таған" фильмына, Мәжит Ғафури исемендәге Башҡорт академия драма театрының "Беҙ - вариҫтар" спектакленә барыу ойошторола.