Радий Хәбиров Шайморатов генерал ордендарын тапшырҙы

5 ноябрҙә Иглин ауылында Башҡортостан Башлығы Радий Хәбиров Иглин районынан махсус хәрби операцияла һәләк булған Руслан Бәширов, Альфред Кәбиров, Виталий Коломасов, Алексей Кулаков, Максим Медведев, Владислав Михайлов, Владимир Пашенцев, Станислав Петрутик, Антон Пешков, Салауат Ғаязов, Михаил Дубровин һәм Денис Фәтхетдиновтарҙың ғаиләләре менән осрашты.

Төбәк етәксеһе хәрбиҙәрҙең ғаиләләренә ысын күңелдән ҡайғы уртаҡлашыуын белдерҙе. Яугирҙар хәрби бурыстарҙы үтәгәндә күрһәткән батырлыҡтары һәм ҡаһарманлыҡтары өсөн һәләк булғандан һуң Шайморатов генерал ордендары менән наградланды. Республика Башлығы уларҙы яугирҙарҙың яҡындарына тапшырҙы.

– Улдарығыҙ һәм ирҙәрегеҙ ғүмерҙәрен Ватан өсөн бирҙе. Һеҙҙең хәлегеҙҙе уртаҡлашабыҙ һәм бергә ҡайғырабыҙ. Уларҙың һәр береһе үҙ бурысын аҙағына тиклем үтәне. Ысын геройҙар, тотош республика улар менән ғорурлана, – тип һыҙыҡ өҫтөнә алды Радий Хәбиров. – Төп бурысыбыҙ – улар хаҡындағы хәтерҙе һаҡлау, исемдәрен мәңгеләштереү, ата-әсәләренә, ғаиләләренә һәм балаларына даими хәстәрлек күрһәтеү, уларға иғтибарлы булыу.

Башҡортостан Башлығы шулай уҡ Республика кардиология үҙәгендә махсус хәрби операцияла һәләк булғандарҙың ата-әсәләре өсөн һауыҡтырыу һәм реабилитация программаһы әҙерләнеүен иҫкә төшөрҙө.

– Район хакимиәтенә мөрәжәғәт итегеҙ, муниципалитет һеҙҙе дауаланыуға алып барыу өсөн транспорт бүлер, – тине Радий Хәбиров. – Урындағы хакимиәттәр һәләк булған ир-егеттәрҙең ата-әсәләре һәм уларҙың ғаиләләре менән бәйләнештә булырға, тейешле ярҙам күрһәтергә тейеш.

https://glavarb.ru/bash/press_serv/novosti/185272.html