Ә һин ҡағыҙ йыйыуҙа ҡатнаштыңмы?

Башҡортостандар акция барышында 182 тонна макулатура йыйып тапшырған. Иҫке ҡағыҙҙар йыйыуҙа уҡыусылар, студенттар, ирекмәндәр, төрлө предприятиелар хеҙмәткәрҙәре ҡатнаша.

– “БумБатл” сараһында ҡатнашыу беҙҙең өсөн экологик мәҙәниәт, тәбиғәткә аңлы мөнәсәбәт тәрбиәләй торған яҡшы һәм изгелекле йолаға әйләнеп бара. Республика йәштәре, йәмәғәтселәр, ирекмәндәр, экологик блогерҙар, эре компаниялар һәм, ғөмүмән, битараф булмаған кешеләр иҫ киткес әүҙемлек күрһәтте, тирә-яҡ мөхит алдында яуаплылығын күрһәтте, 182 тоннанан ашыу ҡағыҙ ҡалдыҡтарын йыйып ҡайтанан эшкәртеүгә тапшырҙы. Был сарала ҡатнашып, һәр кем тирә-яҡ мөхитте һаҡлауға, ҡағыҙ ҡалдыҡтарын кәметеүгә үҙ өлөшөн индерә алды, — тигән Башҡортостан Республикаһының тәбиғәт ресурстары һәм экология министры вазифаһын башҡарыусы Нияз Фазылов.

“Экосистема” хәрәкәте әүҙемселәре 700-ҙән ашыу интерактив белем биреү сараһы үткәргән. Экодәрестәр, оҫталыҡ дәрестәре, ҡағыҙ фестивалдәре һәм ҡалдыҡтарҙы сортлау-эшкәртеү объекттарына экскурсиялар ойоштороп, ирекмәндәр төрлө йәштәге һәм төрлө һөнәрле кешеләрҙе йомоҡ цикллы иҡтисад принциптары менән таныштырған. Һөҙөмтәлә,  быйылғы акцияла ҡатнашыусылар былтырғы менән сағыштырғанда макулатураны 1,5 тапҡырға күберәк йыйған.

Ә һин ҡағыҙ йыйыуҙа ҡатнаштыңмы?

Сығанаҡ: Башинформ.