Өфөлә “АпиГлобал” конгресы бара

“Башҡортостан өсөн бал  – ул тарих, йолалар, мәҙәниәт, иҡтисад... Беҙҙең республика Ватан умартасылыҡ тармағы алдынғыһы булды һәм булып ҡала. Беҙҙә 12 меңләп умартасы, 275 мең ҡорт күсе бар. 2024 йылда беҙ 5 мең тоннанан ашыу тауар балы етештергәнбеҙ – был дөйөм Рәсәй күләменең ундан бер өлөш тиерлек һәм Волга буйы федераль округының өстән бер өлөшө самаһы”, – тине Башҡортостан Башлығы Радий Хәбиров   халыҡ-ара конгрестың пленар ултырышындағы сығышында.

Республика етәксеһе махсус хәрби операция ҡатнашыусыларына  ярҙамдары өсөн умартасыларыбыҙға рәхмәт белдерә. Дөйөм көс менән улар яугирҙәргә 5 тоннанан ашыу бал оҙатҡан.

“Торатау” конгресс-холындағы ҡаҙаныштар һәм эшләнмәләр күргәҙмәһендә 56 стенд эшләй.

М. Кәрим исемендәге 158-се Башҡорт гимназияһының 3-сө физтех синыфы уҡыусыһы Асҡар Монасипов  “Аҡыллы умарта” тигән ҡулайлама эшләгән һәм Башҡортостан Башлығына  уның нисек эшләгәнен һөйләгән. Проект умарталағы бал ҡорттарының йәшәү шарттары тураһында мәғлүмәттәр биреп тора.

Сығанаҡ: Башинформ.