"Әйҙә уйнарға" фестивалендә - боронғо башҡорт уйындары

– Һәр традицион йәки хәҙерге заман  мәҙәниәтендә,  уйын – ул балаға донъяны танытыуҙа  иң беренсе аҙым. Иң тәүге уйындар баланы хәрәкәт итергә һәм хәрәкәттәрҙе координацияларға өйрәтә. Артабан, дүрт-биш йәштән, балалар иғтибарҙы талап иткән, ҡатмарлыраҡ уйындарға күсә. 4-5 йәштән ҡыҙҙар биш таш, ә малайҙар – ашыҡ, таяҡтар һәм таштар менән уйнай, – тип һөйләй Гөлкәй Шаһапова.

Үҫмер саҡта балалар физик яҡтан әүҙем уйындар уйнай башлай. Ә бына хужалыҡ алып барыу күнекмәләрен «ҡыҙ-әсә» («ҡунаҡ саҡырышыу», «өй уйыны») уйынында, ҡурсаҡтар, уларға кейемдәр тегеүҙә күрергә мөмкин.

Шулай итеп, уйындар ярҙамында балалар аралашыу, хеҙмәт күнекмәләренә өйрәнә.

–  Икенсе төрлө әйткәндә, бала социалләшә, әхлаҡи нормаларҙы үҙләштерә һәм йәмғиәттә үҙ урынын биләй. Уйын аша белем алыу бөтә этностың һаҡланып ҡалыуын, яраҡлашыуын һәм үҫешен аңлата, – тип һығымта яһай Гөлкәй Шаһапова.

Өфөлә  “Әйҙә уйнарға” фестивалендә  балалар  асфальтта таш, бау, бүре һәм хатта һарыҡ һөйәктәре менән мауығып уйнай. Ҡаланың бер генә балалар майҙансығында ла бындай күренеште осратмаҫһың. Ә бит борон был уйындарҙы һәр бала белгән, уйнаған.