Өфөлә Башҡорт теле көнө билдәләнде

Байрам датаһы осраҡлы һайланмаған: ул күренекле төрки шағиры һәм мәғрифәтсеһе Мифтахетдин Аҡмулланың тыуған көнөнә тап килтерелгән. Аҡмулла исеме Башҡорт дәүләт педагогия университетына бирелгән. Уҡыу йорто ғәҙәттәгесә байрамдың төп майҙансыҡтарының береһенә әүерелә.

Мифтахетдин Аҡмулла исеме педагогия университетына 2006 йылда бирелде. Ә 2008 йылда юғары уҡыу йортоноң төп корпусы алдындағы майҙанда бөйөк мәғрифәтсегә һәйкәл ҡуйылды, ул университет символдарының береһенә әйләнде.

Байрам хөрмәтенә Мифтахетдин Аҡмулла һәйкәленә сәскәләр һалыу тантанаһы үтте. Унда власть органдары һәм йәмәғәт ойошмалары вәкилдәре, Башҡортостандың юғары уҡыу йорттары һәм колледждары студенттары һәм уҡытыусылары ҡатнашты.

Башҡортостан Республикаһы Дәүләт Йыйылышы–Ҡоролтай рәйесе урынбаҫары Тамара Танһыҡҡужина йыйылыусыларҙы сәләмләне һәм байрам менән ҡотланы. "Республикабыҙҙа Башҡорт теле көнөндә Мифтахетдин Аҡмулла һәйкәленә сәскәләр һалыу һәм башҡорт теленең ни тиклем матур һәм моңло яңғырауын тағы бер тапҡыр иҫкә алыу матур йолаға әүерелде. Башҡортостан етәкселеге туған телебеҙҙе һаҡлау өсөн бик күп эштәр башҡара, уны үҫтереү өсөн шарттар булдыра. Был – беҙҙең бурысыбыҙ. Был көндө студенттарыбыҙҙы хөрмәтләп, уларға Аҡмулла исемендәге стипендия тапшырыу бик күңелле», – тине Тамара Михайловна.

"Аҡмулла университетында башҡорт телен үҫтереү, шулай уҡ «Урал батыр» эпосын һаҡлау буйынса ҙур эш алып барабыҙ. Беҙҙә башҡорт фольклоры ғилми-тикшеренеү үҙәге ойошторолған, туған телебеҙҙе беҙгә килтереп еткергән барлыҡ мәғрифәтселәрҙе хәтерләйбеҙ һәм өйрәнәбеҙ", – тине Башҡортостан Республикаһы Дәүләт Йыйылышы–Ҡоролтай депутаты, БДПУ ректоры Аҡмулла Салауат Сәғитов.

Рәсәй Дәүләт Думаһы депутаты Зариф Байғусҡаров Башҡортостан Башлығына Башҡорт теле көнөн булдырғаны өсөн рәхмәт әйтте һәм туған телде һаҡлау, уны өйрәнеү һәм ул телдә һөйләшеү бик мөһим булыуын һыҙыҡ өҫтөнә алды.

Бөтә донъя башҡорттары ҡоролтайы башҡарма комитеты рәйесе, БР Дәүләт Йыйылышы–Ҡоролтай депутаты Юлдаш Йосопов Аҡмулла университетының һәм уның ректорының башҡорт телен һаҡлау буйынса ҙур эш алып барыуын билдәләне, Салауат Сәғитовҡа рәхмәт белдерҙе һәм башҡорт халҡын туплау, милли мәҙәниәтте, телде һәм рухиәтте һаҡлау һәм үҫтереү буйынса емешле һәм күп йыллыҡ эше өсөн уға Бөтә донъя башҡорттары ҡоролтайының "Ал да нур сәс халҡыңа!" миҙалын тапшырҙы.

Тамара Танһыҡҡужина Башҡортостан Республикаһы вуздарының һәм  колледждарының 11 студентына Башҡортостан халыҡтарының туған телдәрен өйрәнеүгә бәйле уҡыу һәм ғилми эшмәкәрлектә юғары һөҙөмтәләргә өлгөшкәне өсөн Мифтахетдин Аҡмулла исемендәге стипендиялар тапшырҙы.

“Мин дүрт йыл буйы был стипендияны алырға тырыштым һәм ниһайәт алыуыма бик шатмын. Быйыл төрлө конкурстарҙа, форумдарҙа ҡатнаштым, ғилми мәҡәләләр яҙҙым һәм конференцияларҙа ҡатнаштым, шуға күрә Мифтахетдин Аҡмулла исемендәге стипендия алыуға өлгәштем», – тип һөйләне Айгүзәл Яубаҫарова, М.Аҡмулла исемендәге БДПУ-ның башҡорт филологияһының 5-се курс студенты.

Стипендия 2006 йылда булдырыла һәм йыл һайын  колледждарҙың 10 студентына, юғары уҡыу йорттарының 5 студентына тәғәйенләнә. Уны көндөҙгө бүлектә уҡыған, яҡшы билдәләргә өлгәшкән, Башҡортостан халыҡтары телдәрен өйрәнеүгә бәйле олимпиадаларҙа һәм ижади конкурстарҙа еңеүсе йәки призер булған, ғилми тикшеренеүҙәр алып барған һәм туған телдәрҙе өйрәнеүгә бәйле публикациялары булған икенсе һәм артабанғы курс студенттары ала ала. Стипендия бер йылға тәғәйенләнә. 2023 йылдан уның күләме айына 5000 һум тәшкил итә.

Алия КӘШФУЛЛИНА фотолары.