600-ҙән ашыу майҙансыҡта диктант яҙасаҡбыҙ

«Башҡорт теленән диктант-2026» халыҡ-ара ағартыу сараһы географияһын киңәйтә. Быйыл акцияға 615 офлайн-майҙансыҡ ҡушылды, ә ҡатнашыусылар өсөн дөйөм урындар һаны 31 400-ҙән ашып китте.

Акция 2026 йылдың 17 апрелендә онлайн һәм офлайн форматтарҙа үтәсәк.

Йәшенә, белем кимәленә һәм ҡайҙа йәшәүенә ҡарамаҫтан, теләге булған һәр кем ҡатнаша ала.

Майҙансыҡтарҙың 613-ө Рәсәйҙә урынлашҡан. Акция халыҡ-ара кимәлгә лә сыға: диктантты Румынияла һәм Үзбәкстанда ла яҙасаҡтар.

Төбәктәр араһында Башҡортостан Республикаһы алда – беҙҙә 558 майҙансыҡ эшләйәсәк.

Шулай уҡ әүҙем ҡатнашалар:

- Силәбе өлкәһе – 21 майҙансыҡ

- Ырымбур өлкәһе – 7 майҙансыҡ

- Ҡурған өлкәһе – 2 майҙансыҡ

- Свердловск өлкәһе – 2 майҙансыҡ

һәм Рәсәйҙең башҡа төбәктәре.

Иҫегеҙгә төшөрәбеҙ, диктант өс кимәлдә үтә:

- башҡорт телен башланғыс кимәлдә белеүселәр – 418 майҙансыҡ

- башҡорт телендә иркен аралашыусылар – 163 майҙансыҡ

- башҡорт теленең төньяҡ-көнбайыш диалектында яҙыусылар – 34 майҙансыҡ.

Башҡортостандың баш ҡалаһында диктант ғәҙәттәгесә ҡаланың ҙур мәғариф һәм мәҙәни майҙансыҡтарында үтәсәк:

- Башҡорт дәүләт педагогия университеты,

- Өфө фән һәм технологиялар университеты,

- "Торахан" тарихи-мәҙәни комплексы,

- Башҡортостан Республикаһының мәғарифты үҫтереү институты һ.б.

Офлайн-форматта ҡатнашыу өсөн уңайлы майҙансыҡ һайларға һәм акцияның рәсми сайтында теркәлергә кәрәк. Майҙансыҡтарҙың тулы исемлеге, шулай уҡ диктант үткәреү урындары тураһында көнүҙәк мәғлүмәт – рәсми сайтта https://bashdictant.ru/

Гөлдәр Яҡшығолова фотоһы.

Сығанаҡ: “Башҡортостан” гәзите / MAX