Өфөлә география буйынса Бөтә Рәсәй олимпиадаһы тамамланды

Өфөлә география буйынса Бөтә Рәсәй уҡыусылар олимпиадаһының йомғаҡлау этабы тамамланды. Унда 78 төбәктән 276 уҡыусы ҡатнашты. Ярыш һөҙөмтәләре буйынса 24 ҡатнашыусы – еңеүсе, 111-е призер булды.

Мәскәү, Мәскәү өлкәһе, Санкт-Петербург, Башҡортостан, Удмуртстан, Татарстан һәм Хабаровск крайы уҡыусылары айырыуса яҡшы һөҙөмтәләр күрһәтте.

Олимпиаданы ябыу тантанаһында Башҡортостан мәғариф министры Илдар Мәүлетбирҙин, БР Башлығының социаль сәйәсәт буйынса кәңәшсеһе Альбина Ҡасимханова, Дәүләт Йыйылышы- Ҡоролтай депутаты, Рус география йәмғиәтенең Башҡортостан бүлексәһе рәйесе, Аҡмулла исемендәге Башҡортостан педагогия университеты ректоры Салауат Сәғитов ҡатнашты.

Башҡортостандың йәш географтары алты награда яуланы.

Еңеүселәр:

НУРТДИНОВ Марсэль, Өфөнөң 45-се мәктәбе уҡыусыһы;

ҒӘЗИЗОВА Дарина, Республика инженер лицей-интернаты уҡыусыһы.

Призерҙар:

АҪЫЛБАЕВ Азат, Сибайҙың 9-сы лицейы уҡыусыһы;

ПАВЛЮК Леон, Стәрлетамаҡтың 1-се күп профилле полилингваль гимназияһы уҡыусыһы;

ИНЯКОВ Дмитрий, Стәрлетамаҡтың 1-се күп профилле полилингваль гимназияһы уҡыусыһы;

СӘХИБГӘРӘЕВ Тамерлан, Туймазы районы Собханҡол ауылы мәктәбе уҡыусыһы.

“Был фән нисектер баһалап еткерелмәгән кеүек, тип иҫәпләйем – был дөрөҫ түгел. Нәҡ география дәрестәре беҙҙең балаларҙа ҡыҙыҡһыныусанлыҡ, донъяны асыу һәм тирә-йүндәге матурлыҡты күреү теләген тәрбиәләй. Иң мөһиме – тыуған яҡҡа ихтирам һәм һөйөү тәрбиәләй”, – тип яҙған Радий Хәбиров, еңеүселәрҙе һәм призерҙарҙы ҡотлап.

Башинформ таҫмаһынан.