Стәрлетамаҡта V «Мин – уйлап табыусы» республика фестивале үтте

Стәрлетамаҡ ҡалаһындағы «Кванториум» технопаркы бөтә Башҡортостандан – Әбйәлил, Хәйбулла, Ҡариҙел, Дүртөйлө, Стәрлебаш, Иглин, Ғафури, Нуриман, Благовар райондарынан, Стәрлетамаҡ, Өфө, Октябрьский, Благовещен ҡалаларынан – иң һәләтле балаларҙы йыйҙы.

Мәктәп уҡыусыларына өҫтәмә белем биреү үҙәктәре бөтә төбәктәрҙә лә әүҙем үҫә. Улар –  “IT-куб” үҙәктәре, «Кванториум» балалар технопарктары, «Мини-Сириус» һәм «Үҫеш нөктәһе» үҙәктәре. Был майҙансыҡтар “Мәғариф” милли проекты буйынса булдырылған, ә 2025 йылдан “Йәштәр һәм балалар” милли проекты сиктәрендә лә эшләйҙәр.

Техник ижад фестивале төрлө йәштәге балаларҙы берләштерҙе.

Ҡатнашыусылар түбәндәге йүнәлештәрҙә белемдәрен, сослоғон, оҫталығын күрһәтте:

- лего-конструкторлау. Был категорияла балалар баҡсаһы тәрбиәләнеүселәре лә, уҡыусылар ҙа ҡатнашты. Бәләкәстәр –  ҡатмарлы конструкциялар менән, ә өлкәнерәктәр инженерлыҡ теүәллеге менән хайран ҡалдырҙы;

- робофишкалар һәм кегельринг –  робототехника классикаһы! Ҡатнашыусылар программалау оҫталығын һәм роботтарға теүәлдәрҙән-теүәл идара итә белеүен күрһәтте;

- БПЛА трассаһы. Дрондарҙың тиҙ йөрөшлө трассала ярышы фестивалдең иң мауыҡтырғыс  этаптарының береһе булды.

Проекттарҙы яҡлау: балалар эшләп торған роботтарҙы күрһәтте һәм киләсәктә ҡалаларыбыҙҙы яҡшы яҡҡа үҙгәртә алырлыҡ  идеяларҙы тәҡдим итте.

«Мин — уйлап табыусы» фестивале — ҙур асыштарға тәүге аҙым ул.  Үҙ идеяһын хәбәр итә алған һәм уны тормошҡа ашырырға ҡурҡмаған балаларға афарин!

Сығанаҡ: Башҡортостан Мәғариф министрлығы / матбуғат хеҙмәте.