12 майҙа Башҡортостанда Ғаилә аҙналығы башланды

Бөгөн Башҡортостанда Ғаилә аҙналығы башланды. Аҙналыҡты 15 майҙа билдәләнәсәк Халыҡ-ара ғаилә көнө уңайынан нәҡ ошо көндәрҙә үткәрәләр. Ул “Ғаилә” милли проекты сиктәрендә бара.

12–17 майҙа республикала балалар, ата-әсәләр, йәш ғаиләләр, күп балалы ғаиләләр, шулай уҡ балаларға үҙ ата-әсәһен алмаштырған ғаиләләр өсөн төрлө акциялар, саралар, осрашыуҙар үткәреләсәк.

Программаға “Ғаиләнең изгелек бумерангы” акцияһы инә. Ул ауыр донъя хәленә тарыған ғаиләләргә балалар әйберҙәре йыйыуҙан тора.

Шулай уҡ “Сәләмәт ғаилә – сәләмәт республика” акцияһы, “Беҙ бергә – ҙур ғаилә” онлайн-акцияһы, Халыҡ-ара балалар ышаныс телефоны көнөнә арналған саралар һәм “Ғаилә ҡиммәттәре” фестивален үткәреү күҙаллана.

Сығанаҡ: Башҡортостан Ғаилә, хеҙмәт һәм халыҡты социаль яҡлау министрлығы.