Хәйбулла районында йыл уҡыусыһын асыҡлағандар

Хәйбулла районында иң шәп уҡыусыны һайлағандар. “Йыл уҡыусыһы” тигән район конкурсында ун мәктәптән  йөҙ 8–11-се синыф  уҡыусыһы ҡатнашҡан.

Бындай саралар “Йәштәр һәм балалар” милли проекты сиктәрендә үтә.

Ҡатнашыусылар ҡаҙаныштарын күрһәткән, бер-береһе менән танышҡан, тәжрибә уртаҡлашҡан, тағы ла яҡшыраҡ уҡырға, йәмәғәт эштәрендә тағы ла әүҙемерәк булырға, шөғөлдәрендә уңыштар яуларға дәрт-илһам алған.

Еңеүсегә һәм призерҙарға аҡсалата сертификаттар тапшырылған.

“Йылдан-йыл районыбыҙҙан күберәк балаларҙың төрлө кимәлдәрҙә – олимпиадаларҙа, спорт ярыштарында, ижади конкурстарҙа һәм йәмәғәт эшмәкәрлегендә үҙен күрһәтеүенә бик шатмын. Бөгөн беҙ үҙенең эше, тырышлығы һәм таланты менән йәш хәйбуллаларҙың нимәгә һәләтле икәнен күрһәтеүселәрҙе билдәләйбеҙ. Улар – беҙҙең киләсәк, һәр берегеҙ менән ғорурланабыҙ”, – тигән  конкурсты йомғаҡлау тантанаһында  Хәйбулла район башлығы Рөстәм Шәрипов.

Фото: Хәйбулла район хакимиәте.

Мәғлүмәт сығанағы: Хәйбулла район хакимиәте.