Һыу буйында һаҡ булығыҙ

 Быйыл республика йылға-күлдәрендә 17 кеше, шул иҫәптән 4 бала батҡан. “Баймаҡ, Дыуан, Дүртөйлө һәм Шишмә райондарында дүрт ғаилә ҡот осҡос ҡайғы кисерҙе, иң ҡәҙерлеләрен – балаларын юғалтты. Фажиғәләрҙең бөтәһенә лә хәүефһеҙлек ҡағиҙәләрен боҙоу сәбәпсе булған”, – тип яҙа Радий Хәбиров МАКС-тағы каналында.

Республика Башлығы халыҡты һыу буйында ял иткәндә бик һаҡ булырға саҡыра, Башҡортостанда йыһазландырылған хәүефһеҙ пляждар булыуын билдәләй. Махсус пляждар – 197, хәүефһеҙ ял урындары әлегә – 392, тағы ла күберәк булыр, ти ул.

“Иң күбе беҙҙең бик йәмле, туристар өсөн ылыҡтырғыс Мәләүез һәм Нуриман райондарында – ярашлы рәүештә 20 һәм 16. Шуларҙы һайлағыҙ. Ғүмерегеҙҙе хәүеф  аҫтына ҡуймағыҙ, үҙегеҙҙе һәм яҡындарығыҙҙы һаҡлағыҙ”, – ти Радий Хәбиров.

Фото: Радий Хәбиров / МАКС.