Белорет районы Асы мәктәбе 100 йыллығын билдәләне

Быйыл Белорет районы Асы ауылы туғыҙ  йыллыҡ урта белем биреү мәктәбенең Һуңғы ҡыңғырау байрамы йөҙәрләгән тамашасыны йыйҙы. Туғыҙынсы синфты тамамлаған уҡыусыларға аттестат тапшырыу тантанаһы меңдәрсә балаға белем биргән, ҡанат нығытырға ярҙам иткән Асы мәктәбенең бер быуатлыҡ юбилейына ла арналды.

Сара бик йылы һәм тулҡынландырғыс шарттарҙа үтте. Юбилейға мәктәптең төрлө йылдарҙағы сығарылыш уҡыусылары, ветеран уҡытыусылар, абруйлы ҡунаҡтар йыйылды. Йылдар үтһә лә, мәктәп йылдарының яҡты хәтирәләре һәр кемдең күңелендә тәрән урын алған.

Тантанала мәктәп тарихы барланды, фиҙакәр уҡытыусыларға рәхмәт һүҙҙәре яңғыраны, Асы мәктәбе данын ситтә күтәргән өлгөлө сығарылыш уҡыусылары исемдәре телгә алынды. Байрам программаһы йыр-бейеүҙәр, тантаналы ҡотлауҙар менән үрелеп барҙы.  Ошо белем усағында бөгөн уҡыған балаларҙың, йәш быуынға белем таратҡан уҡытыусыларҙың һәм Асы ауылы үҙешмәкәр артистарының  сығыштары байрамға йәм өҫтәне.

Асы ауылында тыуып үҫеп, ошо мәктәпте тамамлаған яугир егеттәргә айырым иғтибар бүленде – махсус хәрби операцияла ил именлеге өсөн баштарын һалған ир-егеттәрҙе сарала ҡатнашыусылар бер минут тынлыҡ менән иҫкә алды.

Белорет районы хакимиәте башлығының социаль мәсьәләләр буйынса урынбаҫары Зөлфиә Басыр ҡыҙы Ғәлиәнова уҡытыусыларҙың намыҫлы хеҙмәтен билдәләп үтте һәм район етәкселеге исеменән рәхмәт хаттары тапшырҙы. Район мәғариф идаралығы етәксеһе Ильмира Рафаэль ҡыҙы Копытова мәктәптең бөгөнгө уңыштары, уҡыусыларҙың төрлө олимпиадаларҙағы еңеүҙәре менән ғорурланыуын белдерҙе һәм алдынғы педагогтарҙы тәбрикләне. Әйткәндәй, бөгөн Асы мәктәбендә йөҙҙән ашыу бала белем ала.

Сарала Башҡортостан Республикаһының Мәғарифты үҫтереү институты проректоры Флүр Әмир улы Шаһисолтанов ҡатнашты. Республикала мәғариф үҫешенә ҙур өлөш индергән Флүр Шаһисолтанов педагог булараҡ тәүге аҙымдарын тап Асы мәктәбендә яһай. Ул үҙенең сығышында мәктәптең оло тарихин барланы, уҡытыусылар коллективына ижади ҡаҙаныштар теләне.

Фото: Асы мәктәбе хакимиәте.