Өфөнөң “Патриот” паркында “Балалыҡты ҡайтарыу” фестивале бара

Фестиваль 2009 йылдан башлап балалар йорттарына булышлыҡ итеү һәм етем  балаларҙы йәмғиәткә яраҡлаштырыу маҡсатында Волга буйы федераль округының Тулы хоҡуҡлы вәкиле бағыуында үткәрелә.

Фестивалде асыу тантанаһында балаларҙы Тулы хоҡуҡлы вәкил урынбаҫары Олег Машковцев сәләмләне.

Башҡортостан Башлығы Радий Хәбиров фестивалгә килгән балаларға һәйбәт һәм уңайлы булһын өсөн бөтәһен дә эшләргә тырышасаҡты, йылыбыҙ, көсөбөҙ һәм белемдәребеҙ менән уртаҡлашасаҡты  вәғәҙә итте.  

“Йүгерегеҙ, һикерегеҙ, үҙегеҙҙе һынағыҙ. Бында үҙегеҙгә ышанысты һәм көсөгөҙҙө арттырырлыҡ ҡыҙыҡ нәмәләр күп...  ...Байрам менән һәм Башҡортостанға рәхим итегеҙ!” – тине Радий Хәбиров бәләкәй ҡунаҡтарға.

Фестиваль бер нисә йүнәлештә үтә. “Баласаҡ йондоҙҙары” конкурсы, “Волга буйының Спорт Олимпы” спартакиадаһы (волейбол, мини-футбол, пневматик мылтыҡтан атыу спорты, өҫтәл теннисы), пилотһыҙ осҡостарға симуляторҙа идара итеү оҫталыҡ дәресе,  “МастерОК” балалар ижады күргәҙмәһе, “Ума палата” интеллектуаль уйыны, аш-һыу әҙерләү ярышы, ҡыҫҡа метражлы фильмдар һәм социаль реклама төшөрөү кеүек саралар балаларға бик оҡшар.

Фото: Олег Яровиков / Башинформ.